Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 168 Hüküm no: 185 Orijinal metin no: [64b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Reis b. Abdullah’ın evini hanımı Rahime Hatun bt. Memi’ye sattığı Cezîre-i Midilli dâhilinde Kalonya kazâsına tâbi‘ Perakle nâm karyeden Mahmud Reis b. Abdullah nâm râcil mahfil-i kazâda, hâmiletü hâze’l-kitâb zevcesi Rahime Hâtun bt. Memi Bey tarafından husûs-ı âti’z-zikre ve tasdîka vekîl olup, bimâ hüve tarîkü’s-sübût şer‘an vekâleti sâbite olan Mehmed Beşe b. Mustafa mahzarında ikrâr ve takrîr-i kelâm edip, karye-i mezbûrede vâki‘ silk-i mülk-i sahîhimde muntazam olan bir cânibi tarîk-i âm ve iki tarafı Mustafa b. Abdullah ve Mehmed b. Abdullah mülkleri ve bir cânibi Komyanos nâm zimmî mülkü ve bir tarafı Yorgaki v. Apostol nâm zimmî mülkü ile mahdûd olan bir bâb beyt-i ulvî ve bir bâb beyt-i süflîyi ve fırını ve ahırı müştemil olan mülk menzilimi, zevcem mezbûre Rahime Hâtun’a on altı bin akçeye bey‘-i bât ile bey‘ edip, ol dahi iştirâ ettikden sonra semen-i mezbûru merkūme Rahime Hâ[tun’un] zimmetimde mehr-i müeccelinden olan on altı bin akçe hakkı ile takās eyledim. Ba‘de’l-yevm menzil-i sâlifü’z-zikr cemî‘-i tevâbi‘ ve levâhıkı ile zevcem mezbûre Rahime Hâtun’un mülk-i müşterâsıdır, keyfe mâ yeşâ’ mutasarrıf olsun dedikde, mukırr-ı merkūmu cemî‘-i kelimât-ı meşrûhasında el-mukarru lehü’l-merkūm dahi bi’l-vekâle tasdîk eylemeğin, mâ-vaka‘a kayd olundu. Tahrîren fî evâsıtı şehri Zilhicce li sene selâse ve ışrîn ve elf. Şuhûdü’l-hâl: İbrahim Çavuş Midilli, Mehmed Beşe b. Abdullah, Sinan Bey b. Abdullah, Hüseyin b. Davud, Kurd Beşe b. Abdullah, Mehmed Beşe er-Râcil, Mustafa b. Mehmed ve gayruhüm.