Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 168 Hüküm no: 186 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. İskender’in vefat eden Kenan Reis b. Abdullah’tan alacaklı olması İşbu sâhibü’l-kitâb Mustafa Beşe b. İskender nâm kimesne mahfil-i kazâda, mahmiye-i Galata tevâbi‘inden Tophâne mahallâtından Fındıklı mahallesi sâkinlerinden olup, bundan akdem fevt olan Kenan Reis b. Abdullah nâm râcilin sulbî sagīr oğlu Mehmed’in ve sulbiye sagīre kızları Fâtıma ve Râbia’nın tesviye-i umûruna vasiyy-i muhtâr olan ammileri Osman b. Abdullah nâm râcil mahzarında takrîr-i da‘vâ edip, müteveffâ-yı mezbûr Kenan Reis zimmetinde karz-ı şer‘îden altı bin akçe hakkım vardır, suâl olunup muhallefâtından alıverilmesin taleb ederim dedikde, gıbbe’s-suâl ve akībe’l-inkâr, müdde‘î-i mezbûrdan müdde‘âsına muvâfık beyyine taleb olundukda, udûlden Mehmed b. Ali ve Hüseyin Beşe b. İlyas nâm kimesneler meclis-i şer‘a li ecli’ş-şehâde hâzırân olup, fi’l-hakīka müteveffâ-yı mezbûr Kenan Reis zimmetinde karz-ı şe[r‘îden] mezbûr Mustafa Beşe’nin altı bin akçe hakkı olduğuna şâhidleriz, şehâdet dahi ederiz deyû edâ-i şehâdet-i şer‘iyye ettiklerinde, şâhidân-ı mezbûrânın şehâdetleri hayyiz-i kabûlde vâki‘ oldukdan sonra mezbûr Mustafa gıbbe’l-istihlâf meblağ-ı mezbûru kabz ve zimmetini turûk-ı şer‘iyyeden bir vechile ibrâ etmediğine half billâhi’l-aliyyi’l-a‘lâ etmeğin, mûcebi ile hükm olunup kayd olundu. Hurrire fî evâsıtı şehri Zilhicce li sene selâse ve ışrîn ve elf. [65a] Şuhûdü’l-hâl: Mustafa b. Cafer, Yunus Beşe b. Abd[ullah], Hüseyin b. Abdullah, Mehmed b. Abd[ullah], Mehmed Çavuş, Mustafa b. Mehmed, İbrahim el-Muhzır ve gayruhüm.