Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 660 Hüküm no: 846 Orijinal metin no: [102a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Kosta’nın, bağını Hristo v. Mihal’e sattığı Vilâyet-i Anadolu’da Yalakābâd kazâsına tâbi‘ Çınarcık nâm karyeden Yani v. Kosta nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Hristo v. Mihal nâm zimmî muvâcehesinde ikrâr ve takrîr-i kelâm edip karye-i mezbûrda vâki‘ bir tarafdan Kara Hoca demekle şehîr Ahmed bağı ve bir tarafdan es-Seyyid Mustafa Çelebi bağı ve iki tarafdan tarîk-i âm ile mahdûd otuz çapalık bağımı ve yine karye-i mezbûrda vâki‘ bir tarafdan vâdi ve bir tarafdan Yani v. Nikola nâm zimmî bağı ve bir tarafdan orman ile mahdûd yirmi beş çapalık bağımı mezbûr Hristo’ya bey‘ bi’l-vefâ ile seksen sekiz esedî guruşa bey‘ edip ol dahi vech-i muharrer üzre iştirâ ve kabûl eyledikden sonra meblağ-ı mezbûr seksen sekiz esedî guruşu yedinden tamâmen ahz u kabz edip zikr olunan bağları mahallinde kabza mezbûr Hristo’yu taslît ve târih-i kitâbdan yüz seksen gün tamâmına değin te’cîl eyledim dedikde vech-i mezbûrun ikrâr-ı meşrûhunu el-mukırrı’l-mezbûr vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: El-Hâc Hasan b. Ali, İbrahim Çelebi b. Hamza, Veli b. Mahmud, Mehmed Çelebi b. ( ), Ali Yazıcı.