Galata Mahkemesi 37 Numaralı Sicil (H. 1022 - 1024 / M. 1613 - 1615) cilt: 37, sayfa: 170 Hüküm no: 188 Orijinal metin no: [65b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Nikola’nın, Kenan b. Abdullah’ta peksimet bedelinden alacağı olduğu Hüseyin b. Abdullah ve Hüseyin Beşe b. İlyas nâm kimesneler meclis-i şer‘-i şerîfde hâzırân olup, hâl-i hayâtında mahmiye-i Galata tevâbi‘inden Fındıklı mahallesinde sâkin olup bundan akdem cezîre-i Kıbrıs’da vefât eden Kenan b. Abdullah er-Râcilin vasiyyetlerini tenfîze ve evlâd-ı sıgārının tesviye-i umûruna vasiyy-i muhtâr olan husûs-i âti’z-zikri münkir Ali Beşe b. Abdullah nâm hasm-ı câhid mahzarında, Todori v. Nikola nâm nasrânîden sâdır olan da‘vâ-yı sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, müdde‘î-i mezbûrun, müteveffâ-yı merkūmun zimmetinde müşterâ-i makbûz peksimet bahâsından râyicü’l-vakt dört bin akçe hakkı vardır. Müdde‘î-i mezbûra, meblağ-ı merkūmu müteveffâ-yı merkūmdan aslen veya vekâleten kısmen veya tamâmen almadığına, hibe etmediğine, bi vechin mine’l-vücûh zimmetini ibrâ etmediğine dâir yemîn-i billâhi’l-azîm verilmesinden sonra, şehâdetleri ba‘de’t-ta‘dîli’ş-şer‘î ve’t-tezkiyyeti’ş-şer‘iyye inde’ş-şer‘ makbûl ve mu‘teber olmağın hâkim şehâdetleri mûcebince meblağ-ı mezbûrun müteveffâyı merkūmun muhallefâtından edâsına hükm etti. Cerâ zâlike ve hurrire fî evâhiri Zilhicce sene 1023. Şuhûdü’l-hâl: Hacı Mehmed b. Cafer, Hacı Muharrem b. Mülâyim?, Mehmed Bey b. Mehmed, Mehmed b. Receb, Hüseyin b. Abdullah.