Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 661 Hüküm no: 847 Orijinal metin no: [102a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Molla Hüsrev mahallesi avârızına vakfedilen paradan eski mütevelli Abbas Efendi’de kalan miktarın yeni mütevelliye verilmesi Mahmiye-i İstanbul’da Molla Hüsrev mahallesi avârızına mevkūfe nukūdun bi’l-fi‘l mütevellîsi olan râfi‘ü’l-kitâb el-Hâc Ali b. Mehmed vakf-ı mezbûrun sâbıkan mütevellîsi olup mahalle-i mezbûre imâmı olan Abbas Efendi nâm kimesne mahzarında üzerine da‘vâ ve takrîr-i kelâm edip asl-ı mâl-ı vakf olan yedi yüz yirmi iki buçuk riyâlî guruşun iki yüz yirmi riyâlî guruşu Hamamcı Hacı Mustafa zimmetinde ve yüz guruşu bakkal Yani zimmetinde ve yüz guruşu dahi Bolu beyi zimmetinde olup bâkī üç yüz yirmi bir buçuk guruşunu mezbûr Abbas Efendi mukaddemâ erbâb-ı zimemden kabz edip hattâ târih-i kitâbdan üç gün mukaddem ikrâr dahi etmişidi, suâl olunup meblağ-ı bâkī-i mezbûr üç yüz yirmi iki buçuk guruşu bana teslîme mezbûr Abbas Efendi’ye tenbîh olunmak matlûbumdur dedikde gıbbe’s-suâl mezbûr Abbas Efendi mâl-ı vakf-ı mezbûrdan makbûzum ancak yüz seksen riyâlî guruşdur deyip ziyâde kabzını inkâr etmeğin müdde‘î-i mezbûrdan müdde‘âsını mübeyyine beyyine taleb olundukda mahalle-i mezbûre sükkânından el-Hâc Ali b. el-Hâc Mehmed ve Mustafa b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Abbas Efendi mâl-ı vakf-ı mezbûrdan mezbûr Hamamcı Hacı Mustafa zimmetinde olan iki yüz yirmi riyâlî guruş ve mezbûr Yani zimmetinde olan yüz guruş ve mezbûr ( ) bey zimmetinde olan yüz guruş ile cümlesi yedi yüz yirmi iki buçuk guruş olmak üzre üç yüz iki buçuk guruş makbûzu olduğunu târih-i kitâbdan üç gün mukaddem bizim huzûrumuzda ikrâr ve bizi işhâd etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince ba‘de’l-hükm ve’t-tenbîh mâ hüve’l-vâki‘ bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çavuş b. Mehmed el-Mübâşir, Fazlullah b. Mehmed, Veli Beşe b. Receb, İsmail Efendi b. İbrahim, Ahmed Beşe b. Mehmed.