Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 662 Hüküm no: 848 Orijinal metin no: [102a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey b. Hasan’ın, Ahmed Çelebi’ye attâr malzemesinden borcunu ödediği Tâife-i Yahud’un Portakal cemâ‘atinden Mosi v. Avraham ve Alaman cemâ‘atinden İsak v. İsrail nâm Yahudiler meclis-i şer‘-i şerîfde bâ‘isü’l-kitâb Hüseyin Bey b. Hasan nâm kimesne mahzarında üzerine da‘vâ ve takrîr-i kelâm edip Sofyalı Ahmed Çelebi nâm kimesne yedimizden müşterâ ve makbûz beynimizde ma‘lûm attâr metâ‘ı ve esbâb bahâlarından zimmetinde hakkımız olan iki yüz doksan esedî guruş için cümlemiz bir yerde iken bizi mezbûr Hüseyin Bey üzerine havâle-i sahîha-i şer‘iyye ile havâle edip mezbûr Hüseyin Bey dahi kabûl ve meblağ-ı mezbûrun yetmiş guruşunu bize edâ edip bâkī zimmetinde kalmağla suâl olunup meblağ-ı bâkī-i mezbûrun merkūm Hüseyin Bey’den alıverilmesi matlûbumuzdur dediklerinde, gıbbe’s-suâl ve’l-inkâr müdde‘iyân-ı mezbûrândan müdde‘âlarını mübeyyine beyyine taleb olundukda her biri ityân-ı beyyineden izhâr-ı acz etmeğin mezbûr Hüseyin Bey’e vech-i şer‘î üzre yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘iyân-ı mezbûrân vech-i muharrer üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Hasan Beşe b. ( ) Çukadâr, İbrahim Çelebi b. Mehmed, Hasan Çelebi b. Ahmed.