Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 662 Hüküm no: 849 Orijinal metin no: [102a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstirati v. Çevako’nun koyunlarını gasbeden Rago v. Yani’den bedelin tahsil etmesi gerektiği Sâbıkan sürekçi olup hâlâ meyhâneci tâifesinden olan bâ‘isü’l-kitâb İstirati v. Çevako nâm zimmî meclis-i şer‘-i şerîfde sürekçi Rago v. Yani nâm zimmî muvâcehesinde üzerine da‘vâ ve takrîr-i kelâm edip mukaddemâ eski Boğdan beyinden iştirâ ve kabz ve def‘-i semen ettiğim bin re’s koyunumu Boğdan vilâyetinde Falcı nâm karye kurbunda ra‘y eder iken mezbûr Yani senin koyunlarını yeni bey bana bey‘ etti deyû ikişer buçuk guruş kıymetli bin re’s koyunumu tegallüben yedimden ahz u kabz etmiş idi suâl olunup mevcûd ise aynılarını bana teslîme müstehlek ise kıymet-i şer‘iyyelerini bana zâmin olmak için mezbûr Yani’ye tenbîh olunmak matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda sürekçi tâifesinden bi tarîki’l-müsâfere Medîne-i Ebî Eyyûb-i Ensârî -radiye anhü’l-Bârî- mahallâtından Otakçılar mahallesinde sâkin Köke v. Dimo ve çoban tâifesinden olup Medîne-i mezbûreye tâbi‘ Küçükköy nâm karyede sâkin Yorgi v. Andriye nâm zimmîler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr eski Boğdan beyinden iştirâ ve kabz ettiği bin re’s koyununu zikr olunan mer‘âda ra‘y eder iken mezbûr Yani senin koyunlarını yeni Boğdan beyi bana bey‘ etti deyû tegallüben bizim huzûrumuzda müdde‘î-i mezbûrun yedinden ahz u kabz eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şâhidân-ı mezbûrânın keyfiyyet-i ahvâlini suâl için küttâb-ı mahkemeden mevlânâ Mehmed Efendi b. İsmail irsâl olunup ol dahi evvelâ mahalle-i mezbûreye ve sâniyen karye-i mezbûreye varıp şâhidân-ı mezbûrânı âlim olan çoban tâifesinden Hristo v. Minho ve Yani v. Dimo ve Rizo v. Dimo ve Yorgi v. Yani ve diğer Yorgi v. Kola ve kasab tâifesinde Bostancı Mehmed Bey b. Mustafa ve Bostancı Halil Bey b. Abdullah ve Berber Hüseyin b. Veli ve Canbaz Mustafa Beşe b. Halil ve diğer Mustafa Beşe b. Musa nâm kimesnelerden şâhidân-ı mezbûrânın keyfiyyet-i hâllerini suâl eyledikde her biri ma‘lûmu olan şâhid-i mezbûr için adl ve makbûlü’ş-şehâde[ler]dir deyû haber verdiklerini mevlânâ-yı mezbûr mahallinde tahrîr ba‘dehû ma‘an irsâl olunan Ramazan b. Ali ile meclis-i şer‘-i hatîre gelip alâ vukū‘ihî inhâ ve takrîr etmeleriyle ta‘dîl ve tezkiyye olunduklarından sonra şehâdetleri makbûle olmağın mûcebince zikr olunan bin re’s koyunun a‘yânı mevcûde ise a‘yânını müdde‘î-i mezbûra teslîme müstehlek ise ba‘de’l-beyân kıymet-i şer‘iyyelerini zâmin olmak üzre merkūm Yani’ye tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’l-âşir min Recebi’l-mürecceb li sene seb‘a ve seb‘în ve elf. Şuhûdü’l-hâl: Bektaş Ağa b. Süleyman el-Mübâşir, İdris Çavuş b. Mustafa, umdetü’l-kuzât Abdülbâkī Efendi, Eyüb Ağa b. Ahmed, Şaban Ağa b. Süleyman, Hasan Beşe Çukadâr.