Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 663 Hüküm no: 850 Orijinal metin no: [102a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Mehmed’in boşandığı kocası Mehmed Bey b. Ramazan’daki mehrini tahsil ettiği Mahmiye-i İstanbul’da el-Hâc İlyas mahallesi sâkinelerinden Hatice bt. Mehmed nâm [hâtun] meclis-i şer‘-i hatîr-i lâzımü’t-tevkīrde zevc-i mutallıkı işbu bâ‘isü’l-kitâb Mehmed Bey b. Ramazan nâm kimesne mahzarında ikrâr ve takrîr-i kelâm edip mukaddemâ mezbûr Mehmed Bey’e nefsim[i] bin akçe mehr-i müeccel ve bin akçe mehr-i mu‘accel üzerine tezvîc edip ol dahi tezevvüc ve kabûl eyledikden sonra beni talâk-ı bâyin ile tatlîk etmeğin zimmetinde mütekarrir ve ma‘kūdun-aleyh olan bin akçe mehr-i müeccelimi mezbûr Mehmed Bey yedinden ahz u kabz edip mehr-i mu‘accelim olan meblağ-ı bâkī bin akçe zimmetinde kalmışidi hâlâ mehr-i mu‘accel-i bâkī bin akçeyi dahi mezbûr Mehmed Bey yedinden bi’t-tamâm ve’l-kemâl ahz u kabz eyledim ba‘de’l-yevm zimmetinde bir akçe ve bir habbe hakkım kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Şa‘bân li sene seb‘a ve seb‘în ve elf. Şuhûdü’l-hâl: Hüseyin Beşe b. Ramazan, Mustafa b. Muharrem, İbrahim b. Ömer, Hasan Beşe b. Ramazan, İbrahim Çelebi b. Abbas.