Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 664 Hüküm no: 852 Orijinal metin no: [102b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Molla Fenârî Vakfı’na ait hâsılatın câbî tarafından vakıf mütevellisine teslim edildiği Merhûm ve mağfûrun leh Molla Fenârî evkāfı’na ber vech-i iştirâk evlâdiyyet üzre mütevellî olan es-Seyyid Ahmed Efendi ve es-Seyyid Mehmed Efendi taraflarından husûs-ı âti’l-beyâna vekîl-i sâbitü’l-vekâle olan Ramazan Bey b. Süleyman nâm kimesne meclis-i şer‘-i hatîr-i lâzımü’t-tevkīrde vakf-ı mezbûrun câbîsi olan bâ‘isü’l-kitâb Mustafa Bey b. Cafer nâm kimesne mahzarında bi’l-vekâle ikrâr ve takrîr-i kelâm edip evkāf-ı mezbûreden olup vilâyet-i Anadolu’da Kütahya kazâsı nevâhîsinden Gümüş nâhiyesine tâbi‘ İnegazi ve Elmalı ve Yüreğir nâm karyelerin bin altmış yedi senesi Martı ibtidâsından bin yetmiş iki senesi Martı ibtidâsına gelinceye değin hâsıl olan mahsûlâtı mezbûr Mustafa Bey vakf-ı mezbûrun câbîsi olmağla taraf-ı vakf için ahz u kabz edip mesârif-i vakfa sarf etmişdi, hâlâ müvekkilân-ı mûmâ-ileyhimâ es-Seyyid Ahmed Efendi ve es-Seyyid Mehmed Efendi mezbûr Mustafa Bey’in bi’t-tevliyye muhâsebelerini görüp sinîn-i mezkûrede zikr olunan karyeler mahsûlâtından merkūm Mustafa Bey yedinde vakf-ı mezbûrun bir akçe ve bir habbesi kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Sahhâf Ahmed Efendi el-Kadı, eş-Şeyh Mehmed Efendi, İbrahim Çelebi b. Mehmed, Mehmed b. Ramazan.