Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 81 Hüküm no: 56 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhûm İbrahim Bey b. Mehmed’in terekesinden, hanımı Ümmühâni Hâtun bt. Abdülkâdir’e mehrinin ödenmesi Medîne-i Ebî Eyyûb-i Ensârî’de Kasımpaşa mahallesinde sâkin iken vefât eden merhûm İbrahim Bey b. Mehmed’in zevce-i metrûkesi ve vârisesi Ümmühâni Hâtun bt. Abdülkādir mahfil-i şer‘de merhûm-ı mezbûrun sulbiye kızı Fâtıma nâm sagīrenin cânib-i şer‘den mansûb vasîsi olan Mehmed Efendi b. Hemdem muvâcehesinde takrîr-i da‘vâ edip zevcim mezbûr zimmetinde yirmi beş bin akçe mehr-i müeccelim vardır, vasiyy-i mezbûrun yedinde olan terekesinden taleb ederim deyip gıbbe’s-suâl vasiyy-i mezbûr cevâbında vesâyeti hasebiyle merhûm-ı mezbûrun terekesine vâzı‘ü’l-yed olduğunu ikrâr ve müdde‘iye-i mezbûrenin mehr-i müecceli meblağ-ı mezbûr yirmi beş bin akçe olduğunu inkâr edip ba‘de talebi’l-beyyine udûl-i müslimînden mahalle-i mezbûre sükkânından Mehmed Çelebi b. Mansur ve Mehmed Bey b. Cafer nâm kimesneler li ecli’ş-şehâde hâzırân olup ba‘de’l-istişhâd fi’l-vâki‘ müdde‘iye-i mezbûrenin mehr-i müecceli yirmi beş bin akçe olduğunu merhûm-ı mezbûr İbrahim bizim huzûrumuzda ikrâr ve i‘tirâf eyledi. Biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘iye-i mezbûre Ümmühâni Hâtun meblağ-ı mezbûr yirmi beş bin akçeyi küllen ve ba‘zan zevci müteveffâ-yı mezbûrdan alıp kabz eylemediğine [23b] ve turuk-ı şer‘iyyeden biri ile ibrâ-i zimmet eylemediğine yemîn teklîf olundukda ol dahi vech-i muharrer üzre yemîn-i billâhi’l-aliyyi’l-azîm etmeğin mûcebi ile hükm olundu. Hurrire fî 3 Cumâdelûlâ sene 1026 Şuhûdü’l-hâl: Ahmed Çelebi b. İbrahim, Abdi Çelebi b. Ömer el-İmâm, Ali Çelebi b. İbrahim, Hüseyin b. Hasan, Ebûbekir [b.] Resul, Ahmed b. Murad, el-Hâc Rıdvan [b.] Abdullah, Mustafa el-Muhzır