Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 86 Hüküm no: 63 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden İbrahim Bey b. Mehmed’in sipâhi Ali Bey b. Mustafa’ya olan borcunun terekesinden ödenmesi İşbu râfi‘ü’l-kitâb sipâhi Ali Bey b. Mustafa tarafından husûs-ı âti’z-zikrde da‘vâ ve hibe ve ahz u kabza vekîl-i sâbitü’l-vekâlesi olan Abdi Çelebi b. Ömer el-İmâm mahfil-i şer‘de medîne-i Ebî Eyyûb’da Kasımpaşa mahallesinde mütevattın olup Rumeli’nde medîne-i Yenişehir’de vefât eden merhûm İbrahim Bey b. Mehmed’in bint-i sulbiyesi Fâtıma nâm sagīrenin cânib-i şer‘den mansûb vasîsi olan Mehmed Efendi b. Hemdem muvâcehesinde üzerine da‘vâ edip bundan akdem müvekkil-i mezbûr Ali Bey merhûm-ı mezbûr İbrahim Bey’e hâl-i hayâtında karz tarîkiyle on yedi bin akçe verip ol dahi kabz ve tesellüm edip meblağ-ı mârrü’z-zikr zimmetinde kalmışdır. El-hâletü hâzihî vasiyy-i mezbûrun yedinde olan terekesinden taleb ederim suâl olunsun dedikde gıbbe’s-suâl vasiyy-i mezbûr vesâyeti hasebi ile merhûm-ı mezbûrun terekesine vâzı‘ü’l-yed idiğini ikrâr ve vech-i mezbûr üzre olan deyni inkâr etmeğin vekîl-i mezbûr Abdi Çelebi’den beyyine taleb olundukda mahalle-i mezbûre sükkânından Mehmed Bey b. Takiyyüddin ve Mehmed Bey b. Ali nâm kimesneler li ecli’ş-şehâde mahfil-i şer‘a hâzırân olup gıbbe’l-istişhâd fi’l-vâki‘ müvekkil-i mezbûr Ali Bey’den merhûm-ı mezbûr İbrahim Bey hâl-i hayâtında bizim huzûrumuzda karz tarîkiyle on yedi bin akçeyi alıp kabz eyledi, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl şehâdetleri makbûle olmağın mûcebi ile hüküm birle mâ hüve’l-vâki‘ sebt olundu. Hurrire fî evâhiri Cumâdelûlâ li sene sittîn ve ışrîn ve elf Şuhûdü’l-hâl: İbrahim Çelebi b. Mehmed, el-Hâc Sefer [b.] Abdullah, el-Hâc Receb [b.] Abdullah, Mehmed Çelebi [b.] Mahmud, muhzır Mustafa ve gayruhüm