Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 87 Hüküm no: 64 Orijinal metin no: [25b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden İbrahim Bey b. Mehmed’in Mehmed Bey b. Ali’ye olan borcunun terekesinden ödenmesi Medîne-i Hazret-i Ebî Eyyûb-i Ensârî -radiyallâhu anhu- de vâki‘ Kasımpaşa mahallesinde mutavattın olan Mehmed Bey b. Ali mahfil-i şer‘-i şerîfde yine mahalle-i mezbûrede mutavattın olup Rumeli’nde medîne-i Yenişehir’de vefât eden merhûm İbrahim Bey b. Mehmed’in bint-i sulbiyesi Fâtıma nâm sagīrenin cânib-i şer‘-i şerîfden mansûb vasîsi olan Mehmed Efendi b. Hemdem muvâcehesinde üzerine da‘vâ edip bundan akdem merhûm-ı mezbûr İbrahim Bey’e hâl-i hayâtında karz tarîkiyle yirmi bin akçe verip ol dahi vech-i muharrer üzre kabz ve tesellüm edip meblağ-ı mezbûr zimmetinde kalmışdır, vasiyy-i mezbûrun yedinde olan terekesinden taleb ederim deyip gıbbe’s-suâl vasiyy-i mezbûr vesâyeti hasebiyle merhûm-ı mersûmun terekesine vâzı‘ü’l-yed [26a] idiğini ikrâr ve vech-i muharrer üzre olan deyni inkâr etmeğin müdde‘î-i mezbûrdan da‘vâsına mutâbık beyyine taleb olundukda udûl-i müslimînden mahalle-i mezbûre sükkânından Mehmed Bey b. Takiyyüddin ve Mehmed Çelebi b. Mansur nâm kimesneler li ecli’ş-şehâde mahfil-i şer‘-i şerîfe hâzırân olup gıbbe’l-istişhâd fi’l-vâki‘ müdde‘î-i mezbûr Mehmed Bey’den merhûm-ı mersûm İbrahim Bey hâl-i hayâtında meblağ-ı mezbûr yirmi bin akçeyi karz tarîkiyle bizim huzûrumuzda ahz u kabz etti, biz bu husûsa bu minvâl üzre şâhidleriz, şehâdet dahi ederiz dediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra gıbbe’l-istihlâf mezbûr Mehmed Bey da‘vâ eylediği meblağ-ı mezbûr yirmi bin akçeyi merhûm-ı mezbûrdan hâl-i hayâtında ahz u kabz etmeyip vechen mine’l-vücûh zimmetini berî etmediğine yemîn teklîf olundukda ol dahi vech-i muharrer üzre yemîn billâh eyledikde mûcebi ile hükm olundu. Hurrire fî evâsıtı Cumâdelûlâ [sene 1026] Şuhûdü’l-hâl: Abdi Çelebi b. Ömer el-İmâm, Ali Çelebi b. Hüseyin, Mustafa [b.] Mehmed, İbrahim el-Muhzır