Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 87 Hüküm no: 65 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden İbrahim Bey b. Mehmed’in Hacı Mustafa b. Hüseyin’e olan borcunun terekesinden ödenmesi Mahmiye-i İstanbul’da Üskübî mahallesinde sâkin iplikçi el-Hâc Mustafa b. Hüseyin tarafından husûs-ı âti’z-zikrde vekîl olduğu nehc-i şer‘î üzre şer‘an sâbite olan el-Hâc Receb b. Abdullah mahfil-i şer‘-i şerîfde medîne-i Hazret-i Ebî Eyyûb-i Ensârî’de Kasımpaşa mahallesinde vefât eden merhûm İbrahim Bey b. Mehmed’in bint-i sulbiyesi Fâtıma nâm sagīrenin savb-ı şer‘den mansûb vasîsi olan Mehmed Efendi b. Hemdem mahfil-i şer‘-i şerîfde üzerine da‘vâ edip vekîli olduğum mezbûr el-Hâc Mustafa’nın merhûm-ı mezbûr İbrahim Bey’in zimmetinde karz tarîkiyle yirmi dört bin akçe hakkı vardır, vefât etmekle meblağ-ı mezbûr yirmi dört bin akçe zimmetinde kalmışdır, vasiyy-i mezbûrun yedinde olan terekesinden taleb ederim deyip gıbbe’s-suâl vasiyy-i mezbûr bi’l-vesâye merhûm-ı mezbûrun terekesine vâzı‘ü’l-yed idiğini ikrâr ve deyn-i mezbûru inkâr edip vekîl-i mezbûrdan beyyine taleb olundukda medîne-i mezbûrede Çırakçı mahallesinde sâkin el-Hâc Kasım b. Abdullah ve merhûm Şehzâde Sultan Mehmed Câmi‘-i şerîfi kurbunda sâkin Mehmed Çelebi b. Mustafa nâm kimesneler li ecli’ş-şehâde mahfil-i şer‘a hâzırân olup gıbbe’l-istişhâd fi’l-vâki‘ merhûm-ı mezbûr İbrahim Bey bizim huzûrumuzda karz tarîkiyle vekîl-i mezbûrdan yirmi dört bin akçeyi [26b] alıp kabz eyledi, biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye mûcebi ile hükm birle mâ vaka‘a sebt olundu. Hurrire fî evâhiri Cumâdelâhire [sene 1026] Şuhûdü’l-hâl: Abdi Çelebi b. Ömer el-İmâm, Mehmed Çelebi b. Ali, İbrahim Çelebi b. Mehmed, Yahya Bey [b.] Mehmed