Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 91 Hüküm no: 70 Orijinal metin no: [28a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ramazan b. İsmail’in Hasan Beşe b. Abdülmennân zimmetindeki alacağının müteveffânın terekesinden tahsil edilmesi İşbu râfi‘ü’l-kitâb el-Hâc Ramazan b. İsmail mahfil-i şer‘de mahmiye-i Galata tevâbi‘inden Fındıklı’da Selime Hâtun mahallesinde müteveffâ olan Hasan Beşe b. Abdülmennân’ın sulbî sagīr oğulları Mustafa ve Mehmed’in cânib-i şer‘den vasiyy-i mansûbu Hanife bt. Abdullah nâm hâtun tarafından husûs-ı âti’z-zikre vekîl olduğu şer‘an sâbit olan Murad Ağa b. Abdullah muvâcehesinde üzerine da‘vâ edip bundan akdem müteveffâ-yı mezbûra karz tarîkiyle iki bin akçe verdim, ol dahi vech-i muharrer üzre ahz edip zimmetinde kalmışdır. El-hâletü hâzihî vasiyy-i mezbûrun yedinde olan terekesinden taleb ederim deyip gıbbe’s-suâl vekîl-i mezbûr müvekkilesinin tereke-i mezbûreye vâzı‘atü’l-yed idiğini ikrâr ve deyn-i mezbûru inkâr etmeğin müdde‘î-i mezbûrdan da‘vâsına mutâbık beyyine taleb olundukda udûl-i ricâlden Mehmed Çelebi b. Mustafa ve Mustafa Çelebi b. Ahmed li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ müteveffâ-yı mezbûr hâl-i hayâtında müdde‘î-i mezbûra karz tarîki ile zimmetimde vâcibü’l-edâ iki bin akçe deynim vardır deyû ikrâr eyledi, biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘î-i mezbûra da‘vâ eylediği meblağ-ı mezbûru hayâtında müteveffâ-yı mezbûrdan ahz etmeyip vechen [28b] mine’l-vücûh ibrâ-i zimmet etmediğine yemîn teklîf olundukda ol dahi yemîn billâh etmeğin mûcebi ile hükm olundu. Fi’t-târihi’l-mezbûr Şuhûdü’l-hâl: Mustafa b. Abdullah, Ahmed b. Abdullah, Ahmed b. Mehmed, Mustafa [b.] Memi, İbrahim el-Muhzır ve gayruhüm