Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 91 Hüküm no: 71 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş Bey b. Pîrî’nin müteveffâ Hasan Beşe b. Abdülmennân zimmetindeki alacağının terekesinden tahsil edilmesi İşbu râfi‘ü’l-kitâb Derviş Bey b. Pîrî mahfil-i şer‘de mahmiye-i Galata tevâbi‘inden Fındıklı’da Selime Hâtun mahallesinde müteveffâ olan Hasan Beşe b. Abdülmennân’ın Mehmed ve Mustafa nâm sulbî sagīr oğullarının vasiyy-i mansûbu olan Hanife bt. Abdullah tarafından husûs-ı âti’z-zikrde vekîli olduğu ale’n-nehci’ş-şer‘i’l-kavîm sâbite olan Murad Ağa b. Abdullah mahzarında üzerine da‘vâ edip bundan akdem mezbûr Hasan Beşe hâl-i hayâtında benden şirâ-i şer‘î ile her biri ikişer bin akçeye üç aded sedefkârî eyer ve bin ikişer yüz akçeye [iki] sağrî eyer cem‘an sekiz bin dört yüz akçeye zikr olunan beş aded eyerleri iştirâ ve tesellüm edip semen-i mezbûrü’n-na‘t sekiz bin dört yüz akçemi bana teslîm etmeden vefât etmekle zimmetinde kalmışdır. El-hâletü hâzihî vasiyy-i mezbûrenin yedinde olan terekesinden taleb ederim deyip gıbbe’s-suâl vekîl-i [mezbûr] müvekkilesinin tereke-i mezbûreye vâzı‘atü’l-yed idiğini ikrâr ve husûs-ı mezkûru bi’l-külliyye inkâr etmeğin müdde‘î-i mezbûrdan da‘vâsına mutâbık beyyine taleb olundukda udûl-i müslimînden mahmiye-i İstanbul’da Yenibahçe kurbunda Karabaş mahallesinde sâkin Hasan b. Ahmed ve Ali b. Hasan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûrdan bizim huzûrumuzda müteveffâ-yı mezbûr mârrü’l-vasf olan üç aded sedefkârî eyerleri ikişer bin akçeye ve iki aded mâru’z-zikr eyerleri dahi bin ikişer yüz akçeye cem‘an sekiz bin dört yüz akçeye iştirâ ve kabz ve tesellüm eyledi, biz bu husûsa şâhidleriz şehâdet dahi ederiz dediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘î-i mezbûra da‘vâ eylediği beş aded eyerlerin semenini müteveffâ-yı mezbûrdan hâl-i hayâtında küllen ve ba‘zan ahz etmeyip ve vechen mine’l-vücûh zimmetini berî etmediğine yemîn teklîf olundukda ol dahi alâ vefki’l-mes’ûl yemîn billâh etmeğin mûcebi ile hükm olundu. Fi’t-târihi’l-mezbûr. [29a] Şuhûdü’l-hâl: Mustafa Beşe [b.] Abdullah, el-Hâc Abdi [b.] İbrahim, Mehmed Reis b. Mustafa, Ahmed Beşe b. Abdullah ve gayruhüm