Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 666 Hüküm no: 854 Orijinal metin no: [102b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miyaser v. Haçador’un, ölen Numanzâde Abdurrahman Efendi’ye sattığı menzilin parasının ödenmediği yolundaki iddiasının geçersiz olduğu Mahmiye-i İstanbul’da Şeyh Ferhad mahallesi sükkânından Miyaser v. Haçador nâm zimmî dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde hâlâ mahmiye-i mezbûrede şıkk-ı evvel defterdârı kāimmakāmı olup bundan akdem bilâ-vâris vefât eden merhûm Numanzâde Abdurrahman Efendi’nin terekesinden olmak üzre zikri âtî menzile vâzı‘ü’l-yed olan Emîrü’l-ümerâ’i’l-kirâm Mehmed Paşa -dâme birruhû ve feşâ- mahzarında da‘vâ ve takrîr-i kelâm edip mahalle-i mezbûrda vâki‘ bir tarafdan Agop nâm zimmî mülkü ve bir tarafdan Serkis nâm zimmî mülkü ve bir tarafdan İbrahim Çelebi bahçesi ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve bir matbah ve bir sofa ve bir havlu ve bir su kuyusu ve zât-ı eşcâr-ı müsmire ve gayr-ı müsmire bahçeyi müştemil mülk menzilimi cümle tevâbi‘ ve levâhıkı ile bin yetmiş altı senesi Cemâziyelâhiresi’nin on yedinci günü müteveffâ-yı mezbûra hayâtında seksen bin akçeye bey‘ ve teslîm edip ol dahi iştirâ ve tesellüm edip semen-i mezbûru kable’l-edâ vefât etmekle zimmetinde kalmağın suâl olunup semen-i mezbûru tereke-i vâfiyesinden bana edâya mûmâ-ileyh Mehmed Paşa’ya tenbîh olunmak matlûbumdur dedikde gıbbe’s-suâl mûmâ-ileyh Mehmed Paşa cevâbında müteveffâ-yı mezbûr hayâtında semen-i mezbûr seksen bin akçeyi tamâmen müdde‘î-i mezbûra edâ ve teslîm edip müdde‘î-i mezbûr dahi ahz ve istîfâ edip hattâ müdde‘î-i mezbûr semen-i merkūmu vech-i muharrer üzre ahz ve istîfâ ettiğini sene-i mezbûre Cemâziyelâhiresi’nin on yedinci günü mahmiye-i mezbûrda Mahmud Paşa mahkemesinde nâibü’ş-şer‘ olan Ahmed Efendi huzûrunda ikrâr edip hüccet olunmuşidi deyû mazmûnu min külli’l-vücûh takrîr-i meşrûhuna mutâbıka ve târih-i mezbûr ile müverraha ve nâib-i mûmâ-ileyhin hat ve hatmini hâviye hüccet-i şer‘iyye ibrâz edicek gıbbe’s-suâl müdde‘î-i mezbûr Miyaser mazmûn-ı hüccet-i mezbûreyi inkâr etmeğin müşârün-ileyh Mehmed Paşa’dan mazmûn-ı hüccet-i mezbûreyi mübeyyine beyyine taleb olundukda udûl-i müslimînden olup mahalle-i mezbûrda imâm olan Mahmud Efendi b. Ali ve Osman b. Ahmed ve Halil b. İbrahim nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Miyaser menzil-i mahdûd-ı mezbûrun semeni olan meblağ-ı mezbûr seksen bin akçeyi müteveffâ-yı mezbûr Numanzâde Abdurrahman Efendi’den hayâtında ahz ve istîfâ ettiği sene-i mezbûr Cemâziyelâhiresi’nin on yedinci günü mahkeme-i mezbûrda nâibü’ş-şer‘ olan mûmâ-ileyh Ahmed Efendi huzûrunda merkūm Abdurrahman Efendi muvâcehesinde ikrâr ve bizi işhâd edip mûmâ-ileyh Ahmed Efendi dahi vech-i muharrer üzre ikrârını tahrîr edip hüccet-i mezbûreyi vermişidi, biz mazmûn-ı hüccet-i mezbûreye bu vech üzre şâhidiz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûr vech-i muharrer üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Recebi’l-ferd li sene seb‘a ve seb‘în ve elf. Şuhûdü’l-hâl: Fahrü erbâbi’t-tahrîr ve’l-kalem Ebûbekir Efendi b. ( ) Tezkireci, umdetü erbâbi’t-tahrîr ve’l-kalem Mustafa Efendi b. ( ) Tezkireci, zübdetü’l-a‘yân İsmail Ağa Serçavûşân, Eyüb Ağa b. ( ) Kethüdâ-yı hazret-i efendi