Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 667 Hüküm no: 855 Orijinal metin no: [102b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Taşçı esnafının Bayezid Ağa mahallesi avârız vakfı için üç avârız hane bedelini üstlendikleri Mahmiye-i İstanbul’da vâki‘ taşçı tâifesinin kethüdâları Duka v. Dumo ve ihtiyârlarından Papa Yorgi v. Serafil ve Kiro v. Duka ve Kostantin v. İstefanos ve Liko v. Minho ve Pando v. Duka ve Koka v. Kiro ve Fentari v. Dimitri ve Duka v. Dino ve Biço v. Fanka nâm zimmîler meclis-i şer‘-i şerîf-i lâzımü’t-teşrîfde mahmiye-i mezbûre hısnı ebvâbından Topkapısı dâhilinde Bayezid Ağa mahallesi avârızına mevkūfe nukūdun bi’l-fi‘l mütevellîsi olan Mahmud Çelebi b. Muharrem ve mahalle-i mezbûre imâmı Mustafa Efendi b. Ramazan ve ahâlî-i mahalle-i mezbûreden Ahmed Çelebi b. Mustafa ve Hüseyin Çelebi b. Ahmed ve İbrahim Çelebi b. Mustafa ve Ali Bey b. Mehmed nâm kimesneler mahzarında her biri takrîr-i kelâm ve ta‘bîr ani’l-merâm edip mahalle-i mezbûrenin dokuz hâne avârızı olup mukaddemâ biz rızâmız ile bir hânesini mahalle-i mezkûr ahâlîsine malımızdan imdâd edegelmişdik ba‘de’l-yevm beher sene zikr olunan dokuz hânenin üç hânesini rızâmız ile kendi malımızdan ahâlî-i mahalle-i mezkûreye imdâd etmek üzre ta‘ahhüd eyledik dediklerinde mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Mehmed, Baba Resul b. Rıdvan, Mehmed Çelebi b. Halil, Ahmed b. Yusuf.