Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 92 Hüküm no: 72 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa b. Şaban’ın müteveffâ Hasan Beşe b. Abdülmennân zimmetindeki alacağının terekesinden tahsil edilmesi Mahmiye-i Galata’da Sinan Reis mahallesinde sâkin el-Hâc Mustafa b. Şaban Fındıklı’da Selime Hâtun mahallesinde müteveffâ olan Hasan Beşe b. Abdülmennân’ın Mehmed ve Mustafa nâm sulbî sagīr oğullarının vasiyy-i mansûbu Hanife bt. Abdullah tarafından husûs-ı âti’z-zikrde vekîli olduğu nehc-i şer‘î üzre sâbit olan Murad Ağa b. Abdullah nâm kimesneyi meclis-i şer‘a ihzâr ve üzerine da‘vâ edip bundan akdem Süleyman b. ( ) nâm kimesnede bin sekiz yüz akçem olup beni mezbûr Süleyman meblağ-ı merkūma mezbûr Hasan Beşe üzerine havâle-i sahîha-i şer‘iyye ile havâle edip mezbûr Hasan Beşe dahi havâle-i mezbûreyi üçümüzün huzûrunda kabûl edip ve Kefe’de meblağ-ı mezbûru mezbûr Süleyman’dan ahz edip meblağ-ı mersûmu bana teslîm etmeden vefât etmekle zimmetinde kalmışdır. El-hâletü hâzihî vasiyy-i mezbûrenin yedinde olan terekesinden taleb ederim deyip gıbbe’s-suâl vekîl-i mezbûr müvekkilesinin bi’l-vesâye tereke-i mezbûreye vâzı‘atü’l-yed idiğini ikrâr ve deyn-i mezbûru bi’l-külliyye inkâr etmeğin müdde‘î-i mezbûrdan da‘vâsına mutâbık beyyine taleb olundukda udûl-i ricâlden Mehmed Çelebi b. Mustafa ve Mustafa Çelebi b. Ahmed li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ bizim huzûrumuzda mezbûr Süleyman müdde‘î-i mezbûra deyni olan bin sekiz yüz akçeye merkūm Hasan Beşe üzerine havâle-i sahîha-i şer‘iyye ile havâle edip mezbûr Hasan Beşe dahi havâle-i mezbûreyi üçünün huzûrunda kabûl edip ba‘dehû meblağ-ı mezbûru Kefe’de merkūm Süleyman’dan ahz eyledi, biz bu husûsa şâhidleriz şehâdet dahi ederiz deyû şehâdet-i şer‘iyye eylediklerinde şehâdetleri makbûle oldukdan sonra müdde‘î-i mezbûra havâle olunan meblağ-ı mezbûru müteveffâ-yı merkūmdan hâl-i hayâtında küllen ve ba‘zan ahz etmeyip vechen mine’l-vücûh zimmetini ibrâ etmediğine yemîn teklîf olundukda ol dahi yemîn billâh etmeğin mûcebi ile hükm olundu. Fi’t-târihi’l-mezbûr Şuhûdü’l-hâl: Ahmed Reis b. Elagöz, Mustafa b. Abdullah, Ahmed Beşe b. Abdullah, Mehmed Beşe [b.] Abdullah ve Muhzır Mustafa ve İbrahim ve gayruhüm