Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 117 Hüküm no: 102 Orijinal metin no: [39a-1 Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in evini istiğlâl yoluyla sattığı Mehmed b. Ahmed nâm kimesne meclis-i şer‘-i şerîfe hâzır olup el-Hâc Ahmed mahallesinde vâki‘ olan bir tarafdan Mehmed b. Abdullah mülkü, diğer tarafdan Mustafa Çavuş b. Abdülmennân mülkü, öteki tarafdan Rukiye Hâtun mülkü ve diğer tarafdan da tarîk-i âm ile mahdûd bulunan cemî‘ mülk menzilini cümle tevâbi‘ ve levâhıkı ile râyicü’l-vakt üç bin akçe semen-i mu‘ayyen-i makbûz ile hâric-i mahmiye-i Galata mahallâtından el-Hâc Memi mahallesinde bundan akdem vefât eden el-Hâc Haydar’ın Hatice nâm sagīre kızına kıbel-i şer‘den mansûb vasî olan hâmil-i hâze’l-kitâb Ahmed Bey b. Mahmud’a bey‘ ettiğini ikrâr ve i‘tirâf eyledi. O da sagīre-i mezbûre ile mâlı ile ve istiğlâl maksadıyla menzil-i merkūmu iştirâ etti. Bâyi‘-i merkūmun menzil-i mesfûru icâreye almak istemesi üzerine müşterî-i mezbûr ba‘de’t-tahliyye ve’t-tekābuz zeylde mezkûr ayın gurresinden bir sene tamâmına râyicü’l-vakt dört yüz elli akçeye icâreye verdi. Vâki‘ ikrâr tasdîk hakkı sâhibince vicâhen ve şifâhen tasdîk edildi. Sonra Ahmed Reis b. Mehmed ve Süleyman Reis b. Abdurrahman nâm kimesneler menzil-i mezbûrun derkine ve ücret-i kirâya îcâb ve kabûlü hâvî kefâletle kefîl oldular. Hurrire fî evâsıtı Şa‘bân. Şuhûdü’l-hâl: Seyyid Mehmed b. Seyyid Mehmed, Hüseyin Çelebi b. Sefer, Haydar Ağa b. Abdullah, el-Hâc Osman b. Abdullah, Ömer b. Abdullah, Keyvan b. Abdullah ve gayruhüm