Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 117 Hüküm no: 103 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kerime Hâtun bt. Süleyman’ın eşi müteveffâ Haydar b. Abdullah’tan kalan gemi hissesini Ali Reis’e sattığı Mahmiye-i Galata tevâbi‘inden Tophâne’de el-Hâc Memi mahallesinde müteveffâ olan merhûm el-Hâc Haydar b. Abdullah’ın zevce-i metrûkesi ve vârisesi olup ve müteveffâ-yı mezbûrun bint-i sulbiyesi Hatice nâm sagīrenin vasiyy-i muhtârı ve vâlidesi Kerime Hâtun bt. Süleyman mahfil-i şer‘de işbu râfi‘ü’l-kitâb Ali Reis b. Seyyid Ali muvâcehesinde ikrâr edip çekelü demekle ma‘rûfe olup on sekiz zirâ‘ olan gemide zevcim müteveffâ-yı mezbûrun on bir buçuk sehim hisse-i şâyi‘ada olan dört sehim hisse-i şâyi‘anın semeni bana ve mâ‘adâsı kızım mezbûre Hatice’ye intikāl edip ve zikr olunan hissenin bey‘i yetîme enfa‘ olmağla sûk-ı sultânîde müzâyede ve rağabât-ı nâs münkatı‘a oldukdan sonra mezbûr Ali Reis üzerinde yedi bin akçede karâr edip ziyâde ile tâlib-i âhar dahi olmamağla ben dahi zikr olunan hissemi ve yetîmenin dahi hissesini safka-i vâhide ve bey‘-i kat‘î ile mezbûr Ali Reis’e yedi bin nakd-i râyic fi’l-vakt akçeye bey‘ edip kabz-ı semen ve teslîm-i mebî‘ eyledim dedikde gıbbe’t-tasdîki’l-mu‘teber mâ hüve’l-vâki‘ ketb olundu. Fî evâili Şa‘bân sene 1028 Şuhûdü’l-hâl: Hüseyin Çelebi b. Sefer, Ahmed Bey b. Mahmud, el-Hâc Osman b. Abdullah, Rıdvan b. Abdullah, Haydar Ağa b. Abdullah, el-Hâc Mehmed el-Münâdî, Ömer b. Abdullah, Mustafa el-Muhzır, İbrahim el-Muhzır ve gayruhüm