Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 118 Hüküm no: 104 Orijinal metin no: [39b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piyâle Kaptan b. Abdülmennân’ın evini istiğlâl yoluyla merhûm Kasımpaşa Vakfı’na sattığı Mahmiye-i Galata tevâbi‘inden kasaba-i Kasımpaşa’da merhûm Kasımpaşa vakfı’na bi’l-fi‘l mütevellî olan fahrü’l-a‘yân Mustafa Çelebi b. Ferhad meclis-i şer‘-i şerîfde kasaba-i mersûmede Yeldeğirmeni mahallesinde sâkin iken bundan akdem müteveffâ olan merhûm Piyâle Kapudân b. Abdülmennân’ın sulbî sagīr oğlu Mehmed’in ve bint-i sulbiyesi İsmihan’ın cânib-i şer‘den vasiyy-i mansûbesi olan Âişe Hâtun bt. Ali muvâcehesinde üzerine takrîr-i da‘vâ edip bundan akdem merhûm-ı mezbûr Piyâle Kapudân hâl-i hayâtında bin yirmi beş senesi Muharremü’l-haramının altıncı gününde mahalle-i mezbûrede vâki‘ olup bir tarafdan Mehmed b. Memi Ağa mülkü ile bir tarafdan Çeşmisiyah bt. Abdullah ve ba‘zan Seyfi mülkü ile ve bir tarafı Medîne-i münevvere vakfı ile ve bir tarafdan tarîk-i âm ile mahdûd olan mülk menzilini bana bi tarîki’l-istiğlâl on beş bin akçeye bey‘ ve teslîm edip ben dahi vakf-ı mezbûr mâlıyla iştirâ ve tesellüm eylediğimden sonra semen-i mezbûru bi’t-tamâm mezbûr Piyâle Kapudân benim yedimden kabz ve tesellüm edip ba‘dehû vech-i şer‘î üzre tahliyye ve tekābuzu bulunduğundan sonra menzil-i mezbûru mezbûr Piyâle Kapudân’a târih-i [40a] merkūmdan bir sene tamâmına değin bin beş yüz akçeye îcâr edip ol dahi istîcâr ve kabûl eyleyip ba‘de zamânin vefât etmekle meblağ-ı mezbûr zimmetde kalmışdır, el-hâletü hâzihî vasiyy-i mezbûrenin yedinde olan terekesinden taleb ederim deyû gıbbe’s-suâl vasiyy-i mezbûre tereke-i mezbûra vâzı‘atü’l-yed idiğini ikrâr ve zikr olunan mübâye‘a ve icâreyi inkâr edip ba‘de talebi’l-beyyine udûl-i müslimînden Mehmed Halîfe b. Mustafa el-Müezzin ve Pîrî Beşe b. Abdünnebi nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ merhûm-ı mezbûr Piyâle Kapudân hâl-i hayâtında târih-i mezkûrda hudûd-ı mezkûre ile mahdûd olan menzil-i mârrü’z-zikri mütevellî-i merkūma bizim huzûrumuzda on beş bin akçeye bi tarîki’l-istiğlâl bey‘ ve teslîm edip ve semen-i mezbûru mütevellî-i merkūm yedinden ve vakf-ı merkūm mâlından bi’t-tamâm ahz u kabz eylediğinden sonra yine menzil-i mezkûru ba‘de’t-tahliyye ve’t-tekābuz târih-i mezbûrdan bir sene tamâmına değin bin beş yüz akçeye istîcâr ve kabûl eyledi biz bu husûsa şâhidleriz şehâdet dahi ederiz deyû iddi‘â-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebi ile hükm olundu. Hurrire fî evâsıtı şehri Şa‘bân sene 1029 Şuhûdü’l-hâl: Hasan Çavuş b. Abdullah, Cafer Beşe b. Abdullah, Mahmud Beşe b. Mahmud, Hasan Beşe el-Münâdî, Mehmed el-Münâdî, Ahmed b. Hüseyin ve gayruhüm