Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 120 Hüküm no: 106 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüdâverdi Reis b. Abdülmennân’ın zevcesi Fâtıma Hâtun’un terekesinden hissesini aldığı Mahmiye-i Galata tevâbi‘inden Tophâne’de Firûz Ağa mahallesinde bundan akdem müteveffât olup verâseti zevci Hüdâverdi Reis b. Abdülmennân’a ve vâlidi el-Hâc Mehmed b. Abdullah ve vâlidesi Âişe Hâtun bt. Behram’a ve sadrî sagīr oğlu Ahmed b. Hüdâverdi Reis’e münhasıra olan Fâtıma [41a] Hâtun’un zevci mezbûr Hüdâverdi Reis meclis-i şer‘-i şerîfde mezbûr el-Hâc Mehmed müteveffâ oldukdan sonra sagīr-i mezbûrun cânib-i şer‘den mansûb vasîsi olup müteveffât-ı mezbûrenin muhallefâtına asâleten [ve] vesâyeten vâzı‘atü’l-yed olan mezbûre Âişe Hâtun ve merkūm el-Hâc Mehmed’in li ebeveyn karındaşı Süleyman’ın sulbî oğulları olup ve mersûm el-Hâc Mehmed’in usûbet-i nesebiyye cihetinden vârisleri olan Mustafa ve Mehmed ve Abdi taraflarından husûs-ı âti’z-zikre vekîl olup vekâleti şer‘an sâbite olan ah-i şakīkleri Cafer Bey mahzarında ikrâr-ı tâm ve takrîr-i kelâm edip zevcem mezbûre Fâtıma Hâtun’un terekesi bana ve mezbûr el-Hâc Mehmed’e ve merkūme Âişe Hâtun’a ve sagīr-i mezbûr Ahmed’e intikāl edip ve mezbûr el-Hâc Mehmed dahi hissesin kabz etmezden evvel müteveffâ olmağla hisse-i şer‘iyyesi bi’l-inhisâr vârisleri olan merkūme Âişe’ye ve mezbûrûn Cafer ve Mustafa ve Abdi ve Mehmed’e intikāl edip ve mezbûrlar hisse-i mezbûrdan kendilere âid olan hisse-i şer‘iyyelerine vaz‘-ı yed edip el-hâletü hâzihî müteveffât-ı mezbûrenin terekesinden olup mahalle-i mezbûrede vâki‘ lede’l-ahâlî ma‘lûmü’l-hudûd olup beynimizde münâza‘un fîh olan menzilden mâ‘adâ muhallefâtından bana intikāl eden rub‘ hisse-i şer‘iyyemi bi’t-tamâm merkūme Âişe Hâtun ve mezbûr Cafer Bey yedlerinden alıp kabz eyledim, min ba‘d menzil-i münâza‘un fîhden mâ‘adâ muhallefât-ı mahkiyede vechen mine’l-vücûh alâka ve nizâ‘ım kalmadı ve mezbûre Âişe Hâtun ve mezbûrûn Cafer ve Mustafa ve Mehmed ve Abdi ile da‘vâ ve nizâ‘ım yokdur dedikde mukırr-ı mezbûr Hüdâverdi Reis’in ikrâr-ı meşrûhunu mezbûre Âişe Hâtun ve merkūm Cafer bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fî evâhiri Şa‘bâni’l-mu‘azzam [li sene 1026] Şuhûdü’l-hâl: Ebûbekir Efendi b. Mehmed el-İmâm, Musa Efendi b. Mehmed el-Mülâzım, Hüseyin Bey b. Hamza et-Tabbâh, Mahmud b. İsa el-Müezzin, Mehmed Bey b. Abdullah, Nebi b. İsmail el-Münâdî, İbrahim b. Ali, Süleyman b. Yusuf, Mahmud b. Ali ve gayruhüm Sah