Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 669 Hüküm no: 858 Orijinal metin no: [103a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Ali Paşa’nın kayıp Mustafa Çavuş b. Mehmed’in kefili olup borcunu İsmail Çelebi’ye ödemesi Mahrûse-i Galata’da Yolcuoğlu mahallesinde sâkin bâ‘isü’l-kitâb İsmail Çelebi b. Ali nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Hatice Hanım bt. Ali Paşa mahzarında üzerine da‘vâ ve takrîr-i kelâm edip mezbûre Hatice Hanım’ın zevci gāib ani’l-meclis Mustafa Çavuş b. Mehmed nâm kimesne zimmetinde çuka ve kumaş bahâlarından hakkım olan iki yüz esedî guruşa mezbûre Hatice Hanım kefîl oldukdan sonra deyn-i mezbûru târih-i kitâbdan on gün tamâmına değin te’cîl eylemişdir, suâl olunup ecel-i mezbûr hulûlünde deyn-i mezbûru bana edâya mezbûre Hatice Hanım’a tenbîh olunmak matlûbumdur dedikde gıbbe’s-suâl mezbûre Hatice Hanım vech-i muharrer üzre cihet-i kefâletden müdde‘î-i mezbûra târih-i kitâbdan on gün tamâmına değin müeccel iki yüz esedî guruş deyni olduğunu ikrâr etmeğin mûcebince meblağ-ı mezbûru ba‘de hulûli’l-ecel müdde‘î-i mezbûra edâya mezbûre Hatice Hanım’a tenbîh olunmağın mâ hüve’l-vâki‘ bi’t-taleb ketb olundu. Fi’l-yevmi’l-âşir min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: İbrahim Çelebi b. Ahmed, İsmail b. Mehmed, Halil b. Mustafa, Ali b. Mehmed.