Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 669 Hüküm no: 859 Orijinal metin no: [103a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülkādir Çelebi b. İbrahim’in, Hatice Hanım’daki alacağını kefil Mehmed Çelebi b. Mehmed’den istediği Mahmiye-i İstanbul’da Ali Paşa-yı Atîk mahallesinde sâkin bâ‘isü’l-kitâb Abdülkādir Çelebi b. İbrahim meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda mahrûse-i Galata’ya tâbi‘ kasaba-i Kasımpaşa’da Sirkeci mahallesinde sâkin Ağırtıcı demekle ma‘rûf Mehmed Çelebi b. Mehmed nâm kimesne mahzarında üzerine da‘vâ ve takrîr-i kelâm edip zikr olunan Sirkeci mahallesi sükkânından Hatice Hanım zimmetinde cihet-i deyn-i şer‘îden hakkım olan bin iki yüz yetmiş beş buçuk esedî guruşa bundan akdem merkūm Mehmed Çelebi emr [ve] kabûlü hâviye kefâlet-i sahîha-i şer‘iyye ile kefîl olmuşdu hâlâ meblağ-ı mezkûr bin iki yüz yetmiş beş buçuk esedî guruşu kefâletine binâen merkūm Mehmed Çelebi’den taleb ederim suâl olunsun dedikde gıbbe’s-suâl mezkûr Mehmed Çelebi fi’l-hakīka müdde‘î-i merkūm Abdülkādir Çelebi’nin mezbûre Hatice Hanım zimmetinde cihet-i mezkûreden hakkı olan bin iki yüz yetmiş beş buçuk esedî guruşa bundan akdem emr [ve] kabûlü hâviye kefâlet-i sahîha ile kefîl olduğunu bi tav‘ihî ikrâr ve i‘tirâf etmeğin mûcebince meblağ-ı mezkûr bin iki yüz yetmiş beş buçuk esedî guruşu müdde‘î-i mezbûra edâ ve teslîme merkūm Mehmed Çelebi’ye tenbîh olunup mâ vaka‘a bi’t-taleb ketb olundu. Fi’l-yevmi’l-hâdî aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: Süleyman Çavuş b. Mahmud, Mehmed Çavuş b. Sefer, Hasan Çelebi b. Ahmed.