Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 134 Hüküm no: 125 Orijinal metin no: [47b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müteveffâ Mehmed Efendi b. Şaban’ın hayatta iken câriyeleri Rus asıllı Kâmile bt. Abdullah ve Gürcü asıllı Kâmile bt. Abdullah’ı azat ettiği İşbu râfi‘atü’l-kitâb orta boylu elâ gözlü Rûsiyyetü’l-asl Kâmile bt. Abdullah ve yine orta boylu elâ gözlü sarışın Gürciyyetü’l-asl diğer Kâmile bt. Abdullah nâm câriyeler meclis-i şer‘-i şerîfde mahmiye-i Galata tevâbi‘inden Kasımpaşa’da Kulaksız mahallesinde müteveffâ [48a] olan merhûm Mehmed Efendi b. Şaban nâm kimesnenin zevce-i metrûkesi ve vârisesi olan Aynî Hâtun bt. Ferhad tarafından husûs-ı âti’z-zikre vekîl olup nehc-i şer‘î üzre vekâleti sâbite olan Mahmud Çelebi b. Mustafa muvâcehesinde üzerine takrîr-i da‘vâ eylediler ki biz merhûm-ı mezbûrun câriye-i memlûkesi iken mevlâmız merhûm-ı mezbûr hâl-i hayâtında ve kemâl-i sıhhatinde hasbeten lillâhi te‘âlâ mâlından âzâd ve mülkünden ihrâc eyleyip biz mu‘taka olmuşken zevcesi mezbûre bize mülkiyyet üzre vaz‘-ı yed eder, suâl olunup kasr-ı yed ettirilmesini taleb ederiz deyip gıbbe’s-suâl vekîl-i mezbûr cevâbında müvekkilesinin câriye-i mezbûretâna vâzı‘atü’l-yed idiğini ikrâr ve mezbûretânın vech-i muharrer üzre mu‘taka olduklarını inkâr edip mezbûretân Kâmile ve diğer Kâmile’den da‘vâlarına mutâbık beyyine taleb olundukda udûl-i müslimînden Dîvân-ı âlî kâtiblerinden mefharü’l-küttâb Mehmed Efendi b. Murad ve Yusuf Bey b. Mustafa nâm kimesneler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-vâki‘ evsâf-ı mezkûre ile muttasıfe olan câriye-i mezbûretânı merhûm-ı mezbûr Mehmed Efendi hâl-i hayâtında hasbeten lillâhi te‘âlâ bizim huzûrumuzda i‘tâk ve tahrîr eyledi biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebi ile mu‘taka olduklarına hükm olunup mâ hüve’l-vâki‘ bi’t-taleb ketb ve terkīm olundu. Hurrire fi’l-yevmi’s-sâmin aşar min Ramazâni’l-mübârek li sene sitte ve ışrîn ve elf Şuhûdü’l-hâl: Mehmed Efendi b. İsa el-İmâm, Ali Çelebi b. ( ), Receb Halîfe b. ( ) el-Müezzin, Hızır Beşe b. Pîrî, Ahmed Çelebi b. Süleyman, Mehmed b. Hüseyin, Kurd b. Abdullah er-Râcil, Receb Beşe er-Râcil ve gayruhüm