Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 136 Hüküm no: 128 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem Hâtun bt. Memi Paşa’nın zevci merhûm Piyâle Kaptan b. Abdülmennân’ın terekesinden mehrini almasına hükmedildiği Mahmiye-i Galata tevâbi‘inden Kasımpaşa’da Yeldeğirmeni mahallesinde müteveffâ olan merhûm Piyâle Kapudân b. Abdülmennân’ın zevce-i metrûkesi ve vârisesi Meryem Hâtun bt. el-merhûm Memi Paşa meclis-i şer‘-i şerîfde merhûm-ı mezbûrun sulbî sagīr oğlu Mehmed ve bint-i sulbiyesi İsmihan nâm sagīrenin vasiyy-i mansûbeleri olan Âişe Hâtun bt. Ali muvâcehesinde üzerine takrîr-i da‘vâ edip zevcim merhûm-ı mezbûr zimmetinde mehr-i müeccelimden altmış bin akçe hakkım vardır, vasiyy-i merkūmenin yedinde olan terekesinden taleb ederim deyip gıbbe’s-suâl vasiyy-i mezbûre bi hasebi’l-vesâye tereke-i mezbûreye vâzı‘atü’l-yed idiğini ikrâr ve mezbûre Meryem Hâtun’un mehr-i müecceli altmış bin akçe idiğini inkâr edip mezbûre Meryem Hâtun’dan da‘vâsına mutâbık beyyine taleb olundukda udûl-i müslimînden Ali Ağa b. Abdullah ve el-Hâc Mehmed b. Cafer nâm kimesneler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-vâki‘ mezbûre Meryem Hâtun merhûm-ı mezbûr Piyâle Kapudân’a bizim huzûrumuzda altmış bin akçe mehr-i müeccel ile akd-i nikâh olunmuşdur biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra mezbûre Meryem Hâtun’a da‘vâ eylediği meblağ-ı mârrü’z-zikr altmış bin akçeyi zevci müteveffâ-yı mezbûrdan hâl-i hayâtında küllen ve ba‘zan ahz u kabz etmeyip vechen mine’l-vücûh zimmetini berî etmediğine yemîn teklîf olundukda ol dahi vech-i muharrer üzre yemîn billâhi’l-aliyyi’l-azîm etmeğin mûcebi ile hükm olunup mâ hüve’l-vâki‘ bi’t-taleb ketb ve terkīm olundu. Hurrire fî evâsıtı Şa‘bâni’l-mu‘azzam [sene 1026]. Şuhûdü’l-hâl: Mustafa Çelebi b. Ferhad el-Mütevellî, Şuayb Çelebi b. İbrahim, Hasan Efendi b. Veli el-İmâm, Mustafa Çelebi b. Yusuf, Ahmed Çavuş b. İbrahim, Mustafa el-Muhzır, İbrahim el-Muhzır ve gayruhüm