Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 137 Hüküm no: 129 Orijinal metin no: [49a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Merhûm Piyâle Kaptan b. Abdülmennân’ın Ali Bey b. Memi Paşa’ya olan borcunun terekesinden ödenmesine hükmedildiği Mahmiye-i Galata tevâbi‘inden Kasımpaşa’da Yeldeğirmeni mahallesinde sâkin Ali Bey b. el-merhûm Memi Paşa meclis-i şer‘-i şerîfde yine mahalle-i mezbûrede müteveffâ olan merhûm Piyâle Kapudân b. Abdülmennân’ın sulbî sagīr oğlu Mehmed ile bint-i sulbiyesi İsmihan nâm sagīrenin savb-ı şer‘den vasiyy-i mansûbeleri Âişe Hâtun bt. Ali muvâcehesinde üzerine takrîr-i da‘vâ edip bundan akdem merhûm-ı mezbûr Piyâle Kapudân hâl-i hayâtında karz tarîkiyle benden yirmi bin akçe [49b] istikrâz ve kabz edip müteveffâ olmağla zimmetinde kalmışdır, el-hâletü hâzihî vasiyy-i mezbûrenin yedinde olan terekesinden taleb ederim deyip gıbbe’s-suâl vasiyy-i mezbûre bi hasebi’l-vesâye tereke-i mezbûreye vâzı‘atü’l-yed idiğini ikrâr ve deyn-i mezbûru bi’l-külliyye inkâr etmeğin müdde‘î-i mezbûrdan da‘vâsına mutâbık beyyine taleb olundukda udûl-i müslimînden Ali Ağa b. Abdülmennân ve el-Hâc Mehmed b. Cafer nâm kimesneler li ecli’ş-şehâde meclis-i şer‘a hâzırân olup gıbbe’l-istişhâd fi’l-vâki‘ merhûm-ı mezbûr Piyâle Kapudân hâl-i hayâtında müdde‘î-i merkūm Ali Bey’den karz tarîkiyle bizim huzûrumuzda yirmi bin akçeyi alıp kabz eyledi biz bu husûsa şâhidleriz şehâdet dahi ederiz deyû edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘î-i mezbûra da‘vâ eylediği meblağ-ı mezbûru küllen ve ba‘zan ahz etmeyip vechen mine’l-vücûh zimmetini ibrâ etmediğine yemîn teklîf olundukda ol dahi yemîn billâh etmeğin mûcebi ile hükm olundu. Hurrire fi’t-târihi’l-mezbûr li seneti’l-mersûme Şuhûdü’l-hâl: Kemâ sebeka