Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 138 Hüküm no: 130 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Piyâle Kaptan b. Abdülmennân’ın evinin Meryem Hâtun bt. Memi Paşa’ya satılarak borcunun ödenmesine hükmedildiği Mahmiye-i Galata tevâbi‘inden Kasımpaşa’da Yeldeğirmeni mahallesinde sâkin olup Karadeniz’de şehîden vefât eden merhûm Piyâle Kapudân b. Abdülmennân’ın sulbî sagīr oğlu Mehmed ile bint-i sulbiyesi İsmihan nâm sagīrenin cânib-i şer‘den mansûbe vasîleri olan Âişe Hâtun bt. Ali meclis-i şer‘de işbu râfi‘atü’l-kitâb Meryem Hâtun bt. el-merhûm Memi Paşa muvâcehesinde ikrâr ve takrîr-i kelâm edip merhûm-ı mezbûrun terekesinden olup mahalle-i mezbûrede vâki‘ bir tarafı Mehmed b. Memi Ağa mülkü ile ve bir tarafı Çeşmisiyah bt. Abdullah mülkü ile bir tarafı Seyfi nâm kimesne mülkü ile ve bir tarafı Medîne-i münevvere vakfı ile ve bir tarafı tarîk-i âm ile mahdûd olup dâhiliyyesinde bir fevkānî odayı ve altında bir odayı ve bir matbah evini ve bir kenîfi ve bahçeyi ve eşcâr-ı müsmire ve gayr-ı müsmireyi müştemil ve hâriciyesinde bir şehnişînli odayı hâvî olan menzil müteveffâ-yı mezbûrun zarûret-i deyni için bey‘ olunmak lâzım gelmeğin menzil-i mezbûr li ecli’l-bey‘ mecâlis-i tâlibîne arz olunup ba‘de’l-müzâyede ve intihâi’r-rağabât mezbûre Meryem Hâtun üzerinde altmış iki bin akçede [50a] karâr edip ziyâde ile tâlib-i âhar dahi olmamağın ben dahi vesâyet-i mahkiyem hasebi ile menzil-i mârrü’z-zikri merkūme Meryem Hâtun’a meblağ-ı mezbûr altmış iki bin nakd-i râyic fi’l-vakt fıddî-i Osmânî akçeye bey‘-i bâtt-ı sahîh-i şer‘î ile bey‘ ve teslîm eyledim ol dahi vech-i muharrer üzre iştirâ ve tesellüm eyledikden sonra semeni olan meblağ-ı mezbûrü’n-na‘t altmış iki bin akçeyi mezbûre Meryem Hâtun yedinden aldım kabz eyledim min ba‘d menzil-i merkūm mülk-i müşterâsıdır keyfe mâ yeşâ’ ve yahtâr mutasarrıfa olsun dedikde mukırra-i mezbûrenin bi’l-vesâye cârî olan ikrârını mezbûre Meryem Hâtun dahi bi’l-muvâcehe tasdîk edip mâ hüve’l-vâki‘ bi’t-taleb ketb ve terkīm olundu. Hurrire fi’l-yevmi’r-râbi‘ aşar min Ramazân li sene sitte ve ışrîn ve elf. Şuhûdü’l-hâl: Haydar Ağa b. Abdullah, Benli Mehmed el-Münâdî, el-Hâc Mehmed [b.] Abdullah, Mustafa el-Muhzır ve gayruhüm