Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 670 Hüküm no: 861 Orijinal metin no: [103a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Mehmed Efendi’nin ölen el-Hâc Mustafa b. el-Hâc Hızır’daki alacağını vârislerinden tahsil ettiği Sâbıkan diyâr-ı Mısriyye’de Buheyre kadısı olan Mehmed Efendi b. Yusuf tarafından husûs-ı âti’l-beyâna vekîl olduğu İbrahim Çelebi b. Ahmed ve Ahmed b. Ali nâm kimesneler şehâdetleriyle şer‘an sâbit olan es-Seyyid Osman Efendi b. es-Seyyid Mehmed meclis-i şer‘-i şerîf-i Ahmedî ve mahfil-i dîn-i münîf-i Muhammedî’de mahmiye-i İstanbul’da Âşık Paşa mahallesi ahâlîsinden olup tarîk-i hacc-ı şerîfde vefât eden el-Hâc Mustafa b. el-Hâc Hızır’ın veresesinden tereke-i vâfiyesine vâzı‘ü’l-yed olan kebîr oğlu Ahmed nâm bâliğ-i emred mahzarında üzerine da‘vâ ve takrîr-i kelâm edip müvekkilim mezbûr Mehmed Efendi yüz kıt‘a esedî guruşunu müteveffâ-yı mezbûrun hayâtında emriyle reşîdi el-Hâc Yusuf nâm kimesneye def‘ ve teslîm edip mezbûr Hacı Yusuf dahi kabz ve tesellüm ettikden sonra kable’l-îfâ mezbûr Hacı Mustafa vefât etmişidi suâl olunup mezbûr Hacı Mustafa’nın emrine binâen tereke-i vâfiyesinden edâya tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müteveffâ-yı mezbûrun emri ile müvekkili merkūm Mehmed Efendi mezbûr Hacı Yusuf’a yüz kıt‘a esedî guruş def‘ ve teslîm edip mezbûr Hacı Yusuf dahi ahz u kabz ettiğini bilmediğine mezbûr Ahmed’e yemîn teklîf olundukda mezbûr Ahmed yemînden nükûl etmeğin mûcebince verilip ba‘dehû mezbûr Mehmed Efendi’ye yemîn vermek üzre meblağ-ı mezbûr yüz kıt‘a esedî guruşu tereke-i vâfiye-i müteveffâ-yı mezbûrdan vekîl-i mezbûra edâya merkūm Ahmed’e tenbîh olundukdan sonra vekîl-i mezbûr es-Seyyid Osman Efendi meclis-i şer‘-i şerîf’de mezbûr Ahmed tarafından ikrâr-ı âti’l-beyânı tasdîka vekîl olduğu nehc-i şer‘î üzre sâbit olan Kenan b. Abdullah mahzarında ikrâr ve takrîr-i kelâm edip ânifen edâsına tenbîh olunan yüz kıt‘a esedî guruşu mezbûr Ahmed yedinden tamâmen ahz u kabz eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Ramazâni’l-mübârek li sene seb‘a ve seb‘în ve elf. Şuhûdü’l-hâl: El-Hâc Mehmed b. Bayezid, el-Hâc Hasan b. Abdullah, el-Hâc Mahmud b. Nasuh, Hasan Beşe b. Abdullah.