Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 152 Hüküm no: 142 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey’in, babası merhûm Memi Paşa b. Abdülmennân’ın terekesinden hissesini aldığı Bundan akdem Karadeniz’de şehîden müteveffâ olan merhûm Memi Paşa b. Abdülmennân’ın sulbî kebîr oğlu ve vârisi olan fahrü’l-a‘yân İbrahim Bey meclis-i şer‘-i şerîfde merhûm-ı mezbûrun zevcesi ve vârisesi ve sagīr oğulları ve vârisleri olan İsmail Bey’in ve Halil Bey’in ve Mehmed Ali’nin ve sagīre kızı ve vârisesi Gevherhan’ın kıbel-i şer‘-i şerîfden mansûb vasîleri olan Âişe Hâtun bt. Üveys mahzarında bi’t-tav‘i’s-sâf ikrâr ve i‘tirâf edip merhûm-ı merkūmun muhallefâtından olup Galata kazâsına tâbi‘ kasaba-i Kasımpaşa’da Yeldeğirmeni mahallesinde vâki‘ kendiye intimâ ile tahdîdden müstağnî iki menzilden mâ‘adâ olan muhallefâtının cümlesinden bana âide olan hisse-i şer‘iyyem ba‘de’t-tahrîr ve’l-kısme beş yüz bin akçe ve beş bin yüz seksen dört akçe olup muhallefât-ı mezbûreden vâlidem merkūme Âişe Hâtun ile beynimizde esmâ ve evsâfı ma‘lûm altmış aded Rûsiyyü’l-asl memlûk forsa kürekçi kâfirlerini ve üç nefer Boğdaniyyü’l-asl forsayı ve üç nefer Macariyyü’l-asl forsayı ve dört nefer Efrenciyyü’l-asl forsayı biri biri üstüne yedişer bin akçeye olmak üzre ve kalafatçı İstefan nâm Boğdaniyyü’l-asl ve varilci Andriye nâm Rûsiyyü’l-asl iki forsa-i memlûkü on beş bin yüz seksen dört akçeye olmak üzre ki cem‘an beş yüz bin ve yüz seksen dört akçe kıymetli yetmiş iki nefer forsa kâfirleridir mârrü’z-zikr hisse-i şer‘iyyem için vech-i muharrer üzre kabûl edip kabz ve tesellüm eyledim min ba‘d muhallefât-ı mezbûreden zikr olunan iki menzilden mâ‘adâ terekede vechen mine’l-vücûh hakkım kalmamışdır, cümle hisse-i şer‘iyyem bana vâsıl olmuşdur dedikde mukırr-ı mezbûru ikrâr-ı meşrûhunda mezbûre Âişe Hâtun vicâhen tasdîk etmeğin mâ vaka‘a ketb olundu. Tahrîren fî evâili Recebi’l-mürecceb li sene sitte ve ışrîn ve elf Şuhûdü’l-hâl: Ali Ağa b. Abdullah ez-Zevvâku’s-Sultânî, Şaban Kapudân b. Abdullah, Mustafa Reis b. İbrahim, Mustafa Kapudân b. Abdullah, Ramazan Ağa b. Abdullah, Mustafa Çelebi b. Ramazan, Mehmed Çavuş b. Ahmed, Ali Râmi b. Abdurrahman, Mehmed Kethüdâ-yı sefîne, Şeyhi Çelebi b. Mustafa el-mellâh, Abdülbâkī Çelebi b. Abdi Efendi el-Hüddâm, Mustafa b. Mehmed el-Muhzır, İbrahim b. ( ) el-Muhzır ve gayruhüm