Galata Mahkemesi 46 Numaralı Sicil (H. 1024 - 1029 / M. 1615 - 1620) cilt: 38, sayfa: 152 Hüküm no: 143 Orijinal metin no: [55b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. Üveys’in on adet câriyenin kendi mülkü olduğunu ispat etmesi ve Fâtıma Hâtun’un muârazadan men edilmesi Bundan akdem Karadeniz’de müteveffâ olup verâseti zevcesi Âişe Hâtun bt. Üveys’e ve sulbî kebîr oğlu İbrahim Bey’e ve sulbî evlâd-ı sıgārı İsmail’e ve Halil’e ve Mehmed Ali’ye ve Gevherhan’a münhasıra olan merhûm Memi Paşa b. Abdülmennân’ın evlâd-ı sıgārı mezbûrûnun kıbel-i şer‘den mansûb vasîleri olan Fâtıma Hâtun bt. ( ) meclis-i şer‘a mezbûre Âişe Hâtun’u ihzâr ve üzerine da‘vâ edip merhûm-ı mezbûrun muhallefâtından her biri dört bin akçe kıymetli Berka nâm ve Merhaba nâm Habeşiyye ve zenciye iki câriye ve her biri sekiz bin akçe kıymetli Revâne ve Dilfirûz ve Mâhi nâm Rûsiyyetü’l-asl üç câriye ve her biri beş bin akçe kıymetli Mihriban ve Peymâne ve Kâmrân ve Bâdısaba ve Eğlence nâm Rûsiyyetü’l-asl beş aded câriye işbu on aded câriyelerin semeni zevce-i mezbûreye bâkīsi dokuz sehim olup mezbûrdan olan evlâd-ı zükûrun her birisine li’z-zekeri mislü hazzi’l-ünseyeyn ikişer sehim ve merkūme Gevherhan’a bir sehim intikāl etmişken mezbûre Âişe Hâtun cümlesine mülkiyyet üzre vaz‘-ı yed edip sıgār-ı mezbûrûnun yedi sehim hisselerini vermekden imtinâ‘ eder suâl olunup ihkāk-ı hak olunmak matlûbumdur dedikde gıbbe’s-suâl mezbûre Âişe Hâtun vech-i muharrer üzre vâzı‘ü’l-yed olduğunu ikrâr edip lâkin zikr olunan câriyeler benim mülk-i mahzımdır dedikde müdde‘iye-i mezbûreden zikr olunan câriyeler merhûm-ı mezbûrun mülkü olduğuna beyyine taleb olundukda ityân-ı beyyineden izhâr-ı acz etmeğin mezbûre Âişe Hâtun’a ba‘de’l-acz an ityâni’l-beyyine zikr olunan câriyeler kendinin mülk-i mahzı idiğine bi’t-taleb yemîn teklîf olundukda ol dahi vech-i muharrer üzre yemîn billâhi te‘âlâ etmeğin …? li’l-hay yemînühû meselesi üzre zikr olunan câriyeler mezbûre Âişe’nin mülkü olmak üzre ve hükm ve ibkā olunup müdde‘iye-i mezbûre da‘vâdan men‘ olundu. Tahrîren fî evâili Receb li sene sitte ve ışrîn ve elf Şuhûdü’l-hâl: El-mezbûrûn