Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 48 Hüküm no: 15 Orijinal metin no: [6a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Belkıs Hâtun’un mehir alacağı olduğu Udûlden Mehmed Efendi b. Ali el-İmâm ve Mustafa b. Abdülkādir nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup râcilîne mahsûs beytülmâlin emîni olup emânet-i mahkiyesi hasebiyle hâl-i hayâtında mahmiye-i Galata mahallâtından Bereketzâde mahallesinde sâkin iken bundan akdem tarîk-i hacda vefât eden ( )’in muhallefâtına vâzı‘ü’l-yed olan ve husûs-ı âti’z-zikri münkir bulunan fahrü’l-akrân Kasım Ağa b. İsmail mahzarında, müteveffâ-yı mezbûrun zevce-i metrûkesi, râfi‘atü hâze’l-kitâb Belkıs Hâtun bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezkûrenin müteveffâ-yı merkūmun zimmetinde nikâhında ma‘kūdun aleyh olan mehr-i müecceli cihetinden râyicü’l-vakt on bin akçe hakkı vardır, elân mezbûre Belkıs Hâtun’un müteveffâ-yı mezbûrun muhallefâtından bunu talebe hakkı vardır. Müdde‘iye-i mezbûreye meblağ-ı merkūmu sağlığında müteveffâ-yı mezkûrun kendisinden veya vekîlinden kısmen veya tamâmen almadığına, hibe etmediğine, bi vechin mine’l-vücûh zimmetini ibrâ etmediğine dâir yemîn billâh verildiğinde ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olduğunda hâkim-i muvakki‘ a‘lâhu şehâdetleri mûcebince meblağ-ı mezbûrun müteveffâ-yı mezkûrun muhallefâtından müdde‘iye-i merkūmeye edâsına hükm etti. Cerâ zâlike ve hurrire fi’l-yevmi’s-sâlis ve’l-ışrîn min şehri Rebî‘ilevvel sene ihdâ ve hamsîn ve elf. Şuhûdü’l-hâl: Ali Efendi b. Mustafa, Hasan Efendi b. Derviş, Süleyman Çelebi b. Ali, Mehmed Beşe b. Mustafa, Ahmed b. Ali el-Münâdî, Mahmud b. İlyas el-Muhzır ve gayruhüm.