Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 672 Hüküm no: 864 Orijinal metin no: [103a-7] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş b. Hızır’ın bahçe ve değirmenini Musli Çelebi b. Receb’e sattığı Vilâyet-i Anadolu’da Ayıntab’da Demirci mahallesi ahâlîsinden olup hâlâ mahmiye-i İstanbul’da bi tarîki’l-müsâfere Elçi hanı’nda sâkin Mehmed Çavuş b. Hızır nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de bâ‘isü’l-kitâb Musli Çelebi b. Receb nâm kimesne mahzarında ikrâr ve takrîr-i kelâm edip akd-i âtînin sudûruna değin yedimde mülküm ve hakkım olup kasaba-i mezbûre kurbunda vâki‘ iki tarafdan mekābir ve bir tarafdan ( ) oğlu vakfı ve bir tarafdan âhar mülküm ile mahdûd bir kıt‘a bahçemi ve kasaba-i mezbûreye tâbi‘ Sazkara nâm karye kurbunda vâki‘ Sazkara suyu ile dâyir ma‘lûmü’l-hudûd bir göz su değirmenimi ve Cevizli nâm mevzi‘de vâki‘ ma‘lûmü’l-hudûd bir kıt‘a hadravât bahçemi mezbûr Musli Çelebi’ye bey‘-i kat‘î ile bi safkatin vâhidetin altı yüz elli esedî guruşa bey‘, ol dahi iştirâ ve kabûl edip semen-i mezbûru yedinden tamâmen ahz u kabz [103b] eylediğimden sonra zikr olunan bahçeler ile değirmeni mahallerinde kabza mezbûr Musli Çelebi’yi taslît eyledim, min ba‘d zikr olunan bahçeler ile değirmen mezbûr Musli Çelebi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-âşir min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Süleyman Ağa b. Mehmed, Süleyman Efendi [b.] Şerefeddin, Mehmed Beşe b. Abdullah, İbrahim Çelebi b. Maksud, Mehmed Ağa b. Mahmud.