Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 672 Hüküm no: 865 Orijinal metin no: [103b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ermeni patriği Mardoros v. Kirkor’un patriklik hakkı alacağı için tayin ettiği vekillere Nazar v. Aznar’ın itirazının reddi Hâlâ Kudüs-i şerîf’de Ermeni patriği olan Mardoros v. Kirkor nâm Ermeni tarafından vech-i âtî üzre vekâlet iddi‘â eden işbu ashâbü’s-sifr Ohannes v. Andres ve Simon ve Haçador ve Bogos v. Iskander ve Avraham v. Vartres ve Serkis v. Karagöz ve kuyumcu Ohan v. Agop ve Toros v. Arakir nâm Ermeniler meclis-i şer‘-i şerîf-i lâzımü’t-teşrîfde mahmiye-i İstanbul’da ( ) mahallesi ahâlîsinden Nazar v. Aznar nâm Ermeni muvâcehesinde her biri üzerine da‘vâ ve takrîr-i kelâm edip mezbûr Mardoros medîne-i İstanbul ve Galata ve Bursa ve Tekfurdağı’nda sâkin Ermeni tâifesi zimmetlerinde olan hakkını ahz u kabz ve kendiye îsâle ve kabz ve îsâlin mütevakkıf olduğu umûrun küllîsine tarafından her birimizi vekîl ve menâbına nâib nasb ve ta‘yîn eyledi ve mezbûr Mardoros’un merkūm Nazar zimmetinde deyn-i şer‘îden on esedî guruş hakkı olmağla suâl olunup meblağ-ı mezbûrun alıverilmesi matlûbumuzdur dediklerinde gıbbe’s-suâl mezbûr Nazar deyn-i mezbûru ikrâr lâkin müdde‘iyyûn-ı mezbûrûnun vech-i muharrer üzre vekâletlerini inkâr etmeğin müdde‘iyyûn-ı mezbûrûndan müdde‘âlarını mübeyyine beyyine taleb olundukda mahmiye-i mezbûrede Langa kurbunda sâkin Asvador v. Agop ve Binyat v. Moyser ve Erzurum’da Buşeh mahallesi ahâlîsinden Abraham v. Serkis nâm Ermeniler li ecli’ş-şehâ[de] meclis-i şer‘a hâzırûn olup istişhâd olunduklarında fi’l-hakīka mezbûr Mardoros medâyin-i mezbûrede sâkin Ermeni tâifesi zimmetlerinde hakkı olan cemî‘ düyûn ve nüzûru ahz u kabza ve kendiye îsâle ve kabz ve îsâl mütevakkıf olduğu umûrun küllîsine tarafından medyûn-ı mezbûra ve bizim huzûrumuzda vekîl ve menâbına nâib nasb ve ta‘yîn edip anlar dahi kabûl ve merâsimini edâya ta‘ahhüd etmişler idi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘iyyûn-ı mezbûrûnun vech-i mübeyyen üzre vekâletlerine hükm olunup meblağ-ı mezbûru müdde‘iyyûn-ı mezbûrûna teslîme merkūm Nazar’a tenbîh olunmağın mâ vaka‘a bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdülmennân Kethüdâ-yı muhzırân, İbrahim Çelebi b. Ahmed, Hasan Çelebi b. Ahmed, Baba Resul b. Rıdvan, Mehmed b. Ramazan inşâallâh dura.