Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 68 Hüküm no: 36 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Abdullah’ın zevcesi Ümmühâni bt. Ahmed’e borçlu olduğu Mahalle-i mezbûre sâkinlerinden Yusuf b. Abdullah meclis-i şer‘de zevcesi râfi‘atü hâze’l-kitâb Ümmühâni bt. Ahmed nâm hâtun mahzarında bi’t-tav‘ ikrâr ve i‘tirâf edip zevcem mezbûre Ümmühâni’nin iki samur kürk bahâsından zimmetimde iki yüz riyâl guruşu olup meblağ-ı mezbûr iki yüz guruş vâcibü’l-edâ ve lâzimü’l-kazâ deynimdir dedikde mukırr-ı mezbûrun vech-i muharrer üzere cârî olan kelâmını el-mukarru lehü’l-merkūme Ümmühâni bi’l-muvâcehe tasdîk edicek, hâzihi’l-vesîka gıbbe’t-taleb ketb olundu. Hurrire fî evâhiri şehri’l-mezbûr li seneti’l-mersûme. Şuhûd[ü’l-hâl]: El-Mezbûrûn.