Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 674 Hüküm no: 867 Orijinal metin no: [103b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Avanos v. Timur’un, el-Hâc Kenan Beşe b. Abdullah’a evini bey‘ bi’listiğlâl yoluyla sattığı Mahmiye-i İstanbul hısnı ebvâbından Balatkapısı dâhilinde Ohri mahallesinde sâkin Avanos v. Timur nâm zimmî mahfil-i kazâda râfi‘ü’l-kitâb el-Hâc Kenan Beşe b. Abdullah mahzarında ikrâr ve takrîr-i kelâm edip mahalle-i mezbûrede vâki‘ bir tarafı Bogoz v. Kirkor mülkü ve bir tarafı Demirci Yani v. Mihal mülkü ve bir tarafı sarrâc Yorgi mülkü ve bir tarafı tarîk-i âm ile mahdûd bir bâb fevkānî oda ve bir bâb tahtânî oda ve tahta-pûş ve kenîfi müştemil mülk menzilimi bi’l-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbûr el-Hâc Kenan Beşe’ye dört yüz kırk esedî guruşa bey‘ ve teslîm ol dahi kendi malı ile bi tarîki’l-istiğlâl iştirâ ve kabûl ve kabz ve tesellüm eyledikden sonra menzil-i mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin mezbûr el-Hâc Kenan Beşe bana altmış altı esedî guruşa îcâr edip ben dahi vech-i muharrer üzre istîcâr ve kabûl ve tesellüm eyledim dedikde gıbbe’t-tasdîki’ş-şer‘î yine mahalle-i mezbûrede sâkin Bogoz v. Kirkor nâm zimmî zikr olunan menzil-i mahdûd-ı mezbûrun derkine ve ücret-i lâzımesine tarafından emr [ve] kabûlü hâviye kefâlet-i sahîha-i şer‘iyye ile kefîl oldum dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Ramazâni’l-mübârek li sene seb‘a ve seb‘în ve elf. Şuhûdü’l-hâl: El-Hâc Osman, Ali Beşe, Osman Çelebi, Usta Musa, el-Hâc Mehmed, Mehmed Bey [b.] Abdullah.