Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 675 Hüküm no: 868 Orijinal metin no: [103b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çeşmi bt. Bilâl’in, Ali Beşe b. Abdülkerim’den aldığı borcu ödemesi Mahmiye-i İstanbul’da Nişancı Paşa-yı Atîk mahallesinde sâkin bâ‘isü’l-kitâb Ali Beşe b. Abdülkerim nâm kimesne meclis-i şer‘-i hatîrde mahmiye-i mezkûrda Çâker Ağa mahallesinde sâkine Çeşmi bt. Bilâl nâm hâtun tarafından husûs-ı âti’l-beyâna vekîl olduğu merkūmenin zâtını ma‘rifet-i şer‘iyye ile ârifân olup zikr olunan Çâker Ağa mahallesinde sâkin Yusuf Bey b. Abdullah ve Ramazan b. Musa nâm kimesneler şehâdetleriyle şer‘an vekâleti sâbit olan Ömer Beşe b. Mehmed Beşe nâm kimesne mahzarında da‘vâ ve takrîr-i kelâm edip bundan akdem müvekkile-i mezbûre Çeşmi Hâtun’a malımdan dört yüz yirmi esedî guruş ikrâz ve teslîm eyledikden sonra mukābelesinde Cafer Ağa vakfı’ndan olup icâre-i mu‘accele ve ayda altmış akçe ücret-i müeccele ile tasarrufunda olup mahalle-i mezkûrda vâki‘ ma‘lûmü’l-hudûd menzilini vefâ’en izn-i mütevellî ile bana ferâğ ve tefvîz ben dahi vech-i muharrer üzre tefevvuz etmişidim, hâlâ meblağ-ı mezbûru müvekkile-i merkūmeden taleb ederim vekîl-i mezbûrdan suâl olunsun dedikde gıbbe’[s-suâl] vekîl-i mezkûr cevâbında meblağ-ı mezbûr dört yüz yirmi esedî guruşu müdde‘î-i merkūm Ali Beşe müvekkili oğlu hâzır bi’l-meclis Hasan nâm kimesneye ikrâz ve teslîm ve mezbûr Hasan dahi ba‘de’l-iktirâz ve tesellüm, vâlidesi müvekkile-i mezbûre oğlu mezbûr Hasan’a deyni mukābelesinde tasarrufunda olan menzil-i mezkûru müdde‘î-i mezbûra izn-i mütevellî ile vefâ’en ferâğ ve tefvîz etmişidi deyip vech-i meşrûh üzre meblağ-ı mezbûru müvekkilesi merkūme Çeşmi Hâtun iktirâz ve kabz ettiğini bi’l-vekâle inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i mezbûrda Kâtib Kasım mahallesinde sâkin el-Hâc Abdi b. Mehmed ve mahrûse-i Galata’ya tâbi‘ kasaba-i Tophâne’de Cihangir mahallesinde sâkin Abdi Çelebi b. Mustafa nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Ali Beşe meblağ-ı mezbûr dört yüz yirmi esedî guruşu bundan akdem bizim huzûrumuzda müvekkile-i mezbûre Çeşmi Hâtun’a ikrâz ve teslîm ol dahi iktirâz ve tesellüm edip mukābelesinde tasarrufunda olan menzil-i mezbûru izn-i mütevellî ile vefâ’en merkūm Ali Beşe’ye ferâğ ve tefvîz ol dahi tefevvuz [104a] etmişidi biz bu husûsa şâhidleriz şehâdet ederiz deyû her biri edâ-i şehâdet-i şer‘iyye ettiklerinde şâhidân-ı merkūmânın keyfiyyet-i hâlini suâl için küttâb-ı mahkemeden mevlânâ Mehmed Efendi b. İsmail ile Mustafa b. Ali irsâl olunup anlar dahi şâhidân-ı mezbûrândan her birinin sâkin olduğu mahalleye varıp ahâlîsinden Halil Çelebi b. Mustafa ve Şükrullah Beşe b. Mehmed ve Ali Hoca b. Hüseyin ve Said Efendi b. Hasan el-İmâm ve Ali Beşe b. Hasan ve Yusuf b. Abdullah ve Mahmud b. Osman ve Kadri Çelebi b. Hasan ve Cafer b. Şaban ve Hasan Beşe b. Abdullah ve Ahmed Beşe b. Musli nâm kimesnelerden mezbûrânın keyfiyyet-i hâllerini suâl eyledikde her biri şâhidân-ı mezbûrân için âdil deyû alenen makbûlü’ş-şehâdelerdir deyû haber verdiklerinde mevlânâ-yı mezbûr mahallinde tahrîr ba‘dehû ma‘an mezbûr Mustafa ile gelip alâ vukū‘ihî inhâ ve takrîr eylediklerinden sonra şehâdetleri makbûle olmağın mûcebince meblağ-ı mezbûru müdde‘î-i merkūm Ali Beşe’ye edâ ve teslîme vekîl-i mezbûr Ömer Beşe’ye tenbîh olunup mâ vaka‘a bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mahmud b. Hacı Süleyman, Receb Bey b. ( ), İbrahim Bey b. Abdullah, Receb b. Şaban.