Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 85 Hüküm no: 52 Orijinal metin no: [17a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mehmed’in, kocası Resul Çavuş b. Şaban’da olan alacağını muhallefâtına el koyan kardeşi Halil Çavuş b. Şaban’dan istediği Mahmiye-i Galata tevâbi‘inden kasaba-i Kasımpaşa mahallâtından Seferikoz mahallesi sâkinlerinden olup bundan akdem vefât eden merhûm Resul Çavuş b. Şaban’ın verâseti zevce-i metrûkesi Fâtıma Hâtun bt. Mehmed’e ve li ebeveyn karındaşı Halil Çavuş b. Şaban’a münhasıra olduğu şer‘an mütehakkik oldukdan sonra mezbûre Fâtıma meclis-i şer‘de merhûm-ı mezbûrun muhallefâtına bi hasebi’l-irsi’ş-şer‘î vâzı‘ü’l-yed olan karındaşı merhûm Halil Çavuş mahzarında da‘vâ ve takrîr-i kelâm edip müteveffâ-yı mezbûrun muhallefâtından olup mahalle-i mezbûrede vâki‘ hudûdunun bir tarafı İbrahim mülkü ve bir tarafı Mehmed Çelebi mülkü ve tarafeyn tarîk-i âm ile müntehî olan iki bâb menzilin arsasını târih-i kitâbdan on iki sene mukaddem zevcim mezbûr Resul Çavuş’a dört bin beş yüz akçeye bey‘ ve temlîk ve teslîm edip mezbûr Resul Çavuş dahi iştirâ ve kabûl ve kabz edip ilâ hâze’l-ân arsa-i mezbûrenin semeni olan meblağ-ı mezbûr merhûm-ı mezbûrun zimmetinde kalmışdır suâl olunup şer‘le alıverilmek taleb ederim dedikde gıbbe’s-suâl ve ba‘de’l-inkâr müdde‘iye-i mezbûrenin müdde‘âsını mübeyyine beyyine taleb olundukda udûl-i müslimînden İbrahim Efendi b. Süleyman ve Mustafa b. Fethullah nâm kimesneler hâzırân fi’l-meclis olup istişhâd olunduklarında fi’l-hakīka müteveffâ-yı mezbûr Resul Çavuş zimmetinde müdde‘iye-i mezbûre Fâtıma Hâtun’un arsa-i mezkûre bahâsından dört bin beş yüz akçe hakkı olduğu bizim ma‘lûmumuzdur, bu husûsa şâhidleriz deyû alâ vefki’l-mes’ûl edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olup müdde‘iye-i mezbûre müteveffâ-yı mezbûrun hâl-i hayâtında meblağ-ı mezkûru küllen ve ba‘zan alıp veyâhud zimmetini bi vechin mine’l-vücûh ibrâ ve iskāt etmediğine yemîn teklîf olundukda half billâhi’l-aliyyi’l-azîm ettikden sonra işbu hurûf gıbbe’t-taleb ketb olundu. Tahrîren fi’l-yevmi’r-râbi‘ min şehri Ramazâni’l-mübârek li sene ihdâ ve hamsîn ve elf. Şuhûdü’l-hâl: İbrahim Kapudân b. Ahmed, Mehmed Beşe b. Mustafa, Mehmed Çavuş b. Memi, Hüseyin Çavuş b. Cafer, el-Hâc Mehmed b. Arslan, İbrahim b. Süleyman.