Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 676 Hüküm no: 869 Orijinal metin no: [104a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban b. Ali’nin, ölen Abdülkerim b. Abdi’nin tek vârisi olduğundan terekenin kendisine teslim edilmesi Vilâyet-i Anadolu’da medîne-i Ankara’ya tâbi‘ Buğralar nâm karye ahâlîsinden bâ‘isü’l-kitâb Şaban b. Ali nâm kimesne meclis-i şer‘-i şerîf-i lâzımü’t-tevkīrde karye-i mezbûre ahâlîsinden olup bundan akdem vefât eden Abdülkerim b. Abdi’nin terekesine bi tarîki’l-vedî‘a vâzı‘ü’l-yed olan Hamza Bey b. İbrahim nâm kimesne mahzarında üzerine da‘vâ ve takrîr-i kelâm edip benim babam Ali ile müteveffâ-yı mezbûrun babası mezbûr Abdi li ebeveyn karındaşlar olup babaları ismi el-Hâc Abdi ve anaları ismi Mihri ve dedeleri ismi Ali ve maskat-ı re’sleri karye-i mezbûre olup müteveffâ-yı mezbûrun verâseti umûmet-i nesebiyye cihetinden bana münhasıra iken mezbûr Hamza Bey tereke-i müteveffâ-yı mezbûru bana teslîmden imtinâ‘ eder suâl olunup tereke-i müteveffâ-yı mezbûru bana teslîme mezbûr Hamza Bey’e tenbîh olunmak matlûbumdur dedikde gıbbe’s-suâl Hamza Bey vech-i muharrer üzre tereke-i müteveffâ-yı mezbûra vaz‘-ı yedini ikrâr lâkin müdde‘î-i mezbûrun verâsetini inkâr edicek müdde‘î-i mezbûrdan vech-i muharrer üzre verâsetine beyyine taleb olundukda fi’l-asl karye-i mezbûreden olup hâlâ mahmiye-i İstanbul’da Yedikule kurbunda sâkin Ali Halîfe b. Veli ve Mustafa b. Abdurrahman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûrun babası Ali ile müteveffâ-yı mezbûrun babası Abdi li ebeveyn karındaşlar olup babaları ismi el-Hâc Abdi ve anneleri ismi Mihri ve dedeleri ismi Ali ve maskat-ı re’sleri karye-i mezbûredir müteveffâ-yı mezbûrun verâseti müdde‘î-i mezbûra münhasıradır gayrı vârisi ve terekesinde âhar müstahık olduğu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince müdde‘î-i mezbûrun vech-i muharrer üzre verâsetine hükm olunup tereke-i müteveffâ-yı mezbûru müdde‘î-i mezbûra teslîme mezbûr Hamza Bey’e tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Fahrü’l-müderrisîn İvaz Efendi [b.] Şaban, Hasan b. Şaban, fahrü’l-akrân Abdi Çelebi, İbrahim b. Ahmed.