Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 122 Hüküm no: 84 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Abdullah’ın varisleri olan çocukları Şâkire ve Fâtıma’nın babalarının Mehmed Reis b. Hasan’da olan alacaklarını aldıkları Mahmiye-i Galata müzâfâtından olup kasaba-i Tophâne’de Mustafa Ağa mahallesinde sâkin iken bundan akdem vefât eden Mustafa Beşe b. Abdullah nâm müteveffânın Şâkire ve Fâtıma nâm sagīrelerin tesviye-i umûruna kıbel-i şer‘den mansûbe vasî olan vâlideleri İsmihan bt. Ömer nâm mahfil-i kazâda işbu bâ‘isü’l-kitâb Mehmed Reis b. Hasan nâm kimesne mahzarında bi’l-vesâye ikrâr ve i‘tirâf edip müteveffâ-yı mezbûrun merkūm Mehmed Reis zimmetinde olan esir bahâsından yirmi bir bin iki yüz akçe ve sefîne mahsûlünden elli dört bin yirmi dört akçenin on iki bin yedi yüz yirmi akçesini zevcim müteveffâ-yı mezbûra teslîm edip kırk bin üç yüz kırk dört akçesini bana teslîm edip ve yine sefîne sermâyesinden yirmi dört bin iki yüz akçe cem‘an seksen altı bin yedi yüz yirmi akçeyi bi’t-tamâm vesâyetim hasebiyle merkūm Mehmed Reis’den ahz ü kabz eyledim dedikde gıbbe’t-taleb ketb olundu. Fi’l-yevmi’l-hâmis min Muharremi’l-harâm li sene 1052. Şuhûdü’l-hâl: Hüseyin Beşe b. Rüstem, es-Seyyid Hüseyin Çelebi b. İbrahim, Ramazan b. Mehmed, Hüseyin Beşe b. Abdullah, Yusuf b. Abdullah, Ali b. Hüseyin, Ahmed Beşe b. Hüseyin ve gayruhüm.