Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 122 Hüküm no: 85 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Efendi b. Mehmed’in varislerinden kayıp kardeşi Halil’in miras hakkını beytülmâl emini Ahmed Ağa’nın alması Mahmiye-i Galata’da kasaba-i Tophâne’de mahalle-i Sefer Kethüdâsı sâkinlerinden iken bundan akdem vefât eden Ömer Efendi b. Mehmed nâm müteveffânın verâseti vâlidesi Herdem bt. Nasuh ve zevce-i metrûkesi Fâtıma bt. Abdullah nâm hâtunlara ve sulbiye sagīre kızları Gevher’e ve Âişe’ye ve li ebeveyn karındaşı olup mefkūd olan Halil nâm kimesneye kable’l-kısme sagīre Âişe dahi vefât edip verâseti li ebeveyn karındaşı mezbûre Gevher’e ve vâlidesi mezbûre Fâtıma’ya ve ammisi mefkūd-ı mezbûr Halil’[e] münhasıra olduğu şer‘an mütehakkik oldukdan sonra mefkūd-ı mezbûr Halil’in hisse-i şâyi‘asını ahz için mahmiye-i mezbûrede yeniçeri beytülmâl emîni olan fahrü’l-akrân ve’l-a‘yân Ahmed Ağa tarafından vekîl olan mumcu Ahmed Beşe b. Hasan nâm kimesne mahfil-i kazâda râfi‘atü hâze’l-kitâb mezbûre Fâtıma mahzarında bi’l-vekâle ikrâr ve i‘tirâf edip mefkūd-ı mezbûr Halil’e karındaşı merkūm Ömer Efendi’den yirmi dört sehimden bir sehim ve mezbûre Âişe’den altı sehimden bir sehim ve mezbûre Gevher’den üç sehimden iki sehim cem‘an dört sehim hisse-i şâyi‘ası için defter-i kassâmda isâbet eden on bir bin yedi yüz doksan sekiz akçeden alâ tarîki’s-sulh müvekkilim merkūm Ahmed Ağa mezbûre Fâtıma’dan altı bin nakd-i râyic fi’l-vakt akçe ahz ü kabz edip zimmetini ibrâ ve iskāt eyledi dedikde mukırr-ı mezbûrun vech-i muharrer üzere cârî olan ikrârını el-mukarru leha’l-merkūme Fâtıma bi’l-vesâye tasdîk ve bi’l-müşâfehe tahkīk edicek, mâ vaka‘a bi’t-taleb ketb olundu. Şuhûdü’l-hâl: Osman Efendi b. Ali el-İmâm, Mehmed Halîfe b. Mustafa el-Müezzin, Kâtib Mehmed Çelebi, Behzad Bey b. Abdullah, Mahmud b. İlyas, Terzi Ramazan b. Hasan ve gayruhüm.