Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 123 Hüküm no: 86 Orijinal metin no: [27a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi’nin Siyavuş’u oğluna ve vasiyetlerinin tenfîzine vasî kıldığı Her ikisi de mahmiye-i medîne-i Galata mahallâtından Manastır mahallesinde sâkin olan udûlden Süleyman Efendi b. Muhyiddin el-İmâm ve Mahmud Efendi b. Bilâl nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup, husûs-ı âti’z-zikri inkâr eden hasm-ı câhid mahzarında, bâ‘isü hâze’l-kitâb Siyavuş b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki mahmiye-i mesfûre mahallâtından Câmi‘-i Kebîr mahallesi sükkânından olup bundan akdem vefât eden Hasan Çelebi b. Receb nâm kimesne hâl-i hayâtı ve kemâl-i akl ve sıhhatinde müdde‘î-i merkūmu Ahmed nâm sagīr oğluna ve vasiyyetlerinin tenfîzine vasiyy-i muhtâr nasb etti. Mezbûr Siyavuş da vesâyet-i merkūmeyi kabûl edip hizmet-i lâzımesini edâyı müte‘ahhid oldu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fi’l-yevmi’t-tâsi‘ ve’l-ışrîn min Zilka‘deti’ş-şerîfe sene ihdâ ve hamsîn ve elf. Şuhûdü’l-hâl: Receb Halîfe b. Ahmed el-Müezzin, Hüseyin b. Ahmed, el-Hâc Yusuf b. Mehmed, el-Hâc Ali b. Rıdvan.