Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 136 Hüküm no: 99 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Ahmed’in miras alacağı konusunda Rahime Hâtun bt. Abdülmennân ile olan muârazadan men‘ olunduğu Mahmiye-i Galata tevâbi‘inden kasaba-i Beşiktaş’da Sultan Süleyman mahallesinde sâkine iken bundan akdem vefât eden Hatice bt. Hasan Beşe nâm hâtunun verâseti zevc-i metrûkü Mustafa Beşe b. Ahmed ve anası Rahime Hâtun bt. Abdülmennân’a münhasıra olduğu şer‘an müte‘ayyin oldukdan sonra mezbûr Mustafa Beşe mahfil-i kazâda merkūme Rahime Hâtun mahzarında üzerine da‘vâ ve takrîr-i kelâm edip müteveffâ-yı mezbûrun muhallefâtından hediyesi bin akçe kıymetli bir Kelâm-ı izzet ve üç yüz akçe kıymetli bir bakır sini ve beş yüz akçe kıymetli bir maşraba ve bin akçe kıymetli bir ferâce ve iki bin akçe kıymetli iki altın hâtem ve beş yüz akçe kıymetli bir çatma yorgan ve altı yüz akçe kıymetli iki çift çatma yastık ve üç yüz akçe kıymetli iki kumaş yastık ve üç yüz akçe kıymetli iki top bez ve beş yüz akçe kıymetli bir sırmalı makrama ve her biri yüzer akçe kıymetli üç tülbent makrama ve dört yüz akçe kıymetli bir münakkaş tülbent örtüsü ve yüz akçe kıymetli kilim ve iki yüz akçe kıymetli üç çarşaf ve her biri ellişer akçe kıymetli üç aded yüz yastığı ve bin akçe kıymetli bir sîm kuşak ve iki yüz akçe kıymetli iki sandık ve dört bin akçe kıymetli bir saç bağı ve beş yüz akçe kıymetli bir küpe ve dört bin akçe kıymetli iki inci yaka ve üç yüz akçe kıymetli bir çatma döşek ve iki yüz akçe kıymetli bir hamam kaliçesini mezbûre Rahime Hâtun ahz ve ihfâ edip muhallefâta idhâl etmemişdir hâlâ eşyâ-i mezkûrdan hissemi taleb ederim, suâl olunsun dedikde gıbbe’s-suâl [ve] akībe’l-inkâr müdde‘î-i mezbûrdan da‘vâsına mutâbık beyyine taleb olundukda ikāmet-i beyyineden izhâr-ı acz edip istihlâf etmeğin mezbûre Rahime Hâtun’a zikr olunan eşyâyı ahz ve ihfâ etmeyip ve müteveffât-ı mezbûrenin muhallefâtından bir şey saklamadığına ve hâlâ yedinde muhallefâtdan bir şey olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin müdde‘î-i merkūm Mustafa Beşe mu‘ârazadan men‘ olunup mâ vaka‘a gıbbe’l-ibtigā ketb olundu. Fi’l-yevmi’l-hâdî [ve]’l-ışrîn min Zilhicceti’ş-şerîfe li sene ihdâ ve hamsîn ve elf. Şuhûdü’l-hâl: Baltacı Ahmed Ağa b. Abdülahad, Ramazan Efendi el-Kadı, Ahmed Çelebi b. Süleyman Efendi el-Kadı, Hüseyin Çelebi b. Ahmed. Sümme mâte Ahmed el-mezbûr ve inhasara verâsetühû ilâ ümmihî el-med‘uvvetü Fâtıma bt. Abdullah ve ilâ ahîhi li eb el-med‘uv Abdurrahman b. el-Hâc Hasan. Muhallefât; 43.745 Minhe’l-ihrâcât; Resm-i âdî 1.000 akçe Kassâmiyye 350 Kalemiyye 240 akçe İhzâriyye ve huddâmiyye 110 akçe Yekûn: 1.700 Sahhe’l-bâkī bi’t-taksîmi’l-verese; Hissetü’l-üm 14.015 Hissetü’l-ah li eb 26.030 Hurrire be ma‘rifeti el-fakīru ileyhi sübhânehû Şeyh Mehmed b. Ataullah el-Kassâmü’l-askerî bi medîneti Galata -ufiye anhu-