Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 143 Hüküm no: 104 Orijinal metin no: [33a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Halil Beşe’nin Eyüb Beşe’ye mal bedelinden borcu olduğu Udûlden Şahin Beşe b. Hüsrev ve Hüseyin Beşe b. Mehmed nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup, mahmiye-i Galata mahallâtından Alaca Mescid mahallesinde sâkin iken bundan akdem vefât eden Halil Beşe’nin Rukiye nâm sagīre kızına tesviye-i umûru için vasiyy-i muhtâr olan Osman Çelebi b. Derviş nâm kimesne mahzarında, Eyüb Beşe b. ( )’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘î-i mezbûrun müteveffâ-yı merkūmun zimmetinde kavs-ı ahmer ve bakır kazan bahâsından râyicü’l-vakt yedi yüz yetmiş altı akçe hakkı vardır, elân merhûm-ı mezbûrun muhallefâtından edâsı lâzımdır. Müdde‘î-i mezbûra meblağ-ı merkūmu sağlığında müteveffâ-yı mezkûrun kendisinden veya vekîlinden kısmen veya tamâmen almadığına, hibe etmediğine, bi vechin mine’l-vücûh ve bi sebebin mine’l-esbâb zimmetini ibrâ etmediğine dâir yemîn billâh verildiğinde ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olduğunda hâkim şehâdetleri mûcebince meblağ-ı mezbûrun müteveffâ-yı mezkûrun muhallefâtından müdde‘î-i merkūma edâsına hükm etti. Cerâ zâlike ve hurrire fi’l-yevmi’s-sânî min Muharremi’l-harâm sene isneyn ve hamsîn ve elf. Şuhûdü’l-hâl: Şaban Beşe b. Ali ve Ahmed Çelebi b. Ali ve Mahmud b. İlyas ve gayruhüm mine’l-hâzırîn.