Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 144 Hüküm no: 106 Orijinal metin no: [33a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Halil Beşe’nin mal bedelinden el-Hâc Mehmed’e borçlu olduğu Udûlden Ahmed Çelebi b. Kasım ve Ali Çelebi b. İbrahim nâm kimesneler meclis-i şer‘-i şerîf ve mahfil-i dîn-i münîf el-masûn ani’t-tağyîr ve’t-tahrîfe hâzırân olup, mahmiye-i Galata mahallâtından Alaca mescid mahallesinde sâkin iken bundan akdem vefât eden Halil Beşe’nin Rukiye nâm sagīre kızına vasiyy-i muhtâr olan Osman Çelebi b. Derviş nâm kimesne mahzarında, el-Hâc Mehmed b. Ömer nâm kimesneden sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘î-i mersûmun müteveffâ-yı merkūmun zimmetinde çuka-i ahmer ve kemha bahâsından râyicü’l-vakt yüz otuz beş riyâlî guruş hakkı vardır. Merhûm-ı mezbûrun muhallefâtından edâsı lâzımdır. Müdde‘î-i mezbûra meblağ-ı merkūmu sağlığında müteveffâ-yı mezkûrun kendisinden veya vekîlinden kısmen veya tamâmen almadığına, hibe etmediğine, bi vechin mine’l-vücûh ve bi sebebin mine’l-esbâb zimmetini ibrâ etmediğine dâir yemîn billâh verildiğinde ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olduğunda hâkim-i muvakki‘ şehâdetleri mûcebince meblağ-ı mezbûrun [33b] müteveffâ-yı mezkûrun muhallefâtından müdde‘î-i merkūma edâsına hükm etti. Cerâ zâlike ve hurrire fi’l-yevmi’s-sânî min Muharremi’l-harâm sene isneyn ve hamsîn ve elf. Şuhûdü’l-hâl: El-Mezbûrûn.