Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 145 Hüküm no: 107 Orijinal metin no: [33b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Kemal’e kocası Receb Beşe b. Şaban’ın muhallefâtından mehir alacağının verilmesi Mahmiye-i Galata müzâfâtından kasaba-i Tophâne mahallâtından Mustafa Ağa mahallesi sükkânından olup bundan akdem vefât eden merhûm Receb Beşe b. Şaban nâm müteveffânın zevce-i metrûkesi Hatice bt. Kemal nâm hâtun meclis-i şer‘-i hatîr-i lâzimü’t-tevkīrde yine merhûm-ı mezbûrun sagīr sulbî oğulları Hasan ve Mehmed ve kızı Âişe nâm yetîmlerin tesviye-i umûrlarına kıbel-i şer‘den mansûbe vasîsi ceddeleri Âişe bt. Hasan mahzarında takrîr-i da‘vâ edip ve merhûm-ı mezbûrun zimmetinde mehr-i müeccelim iki bin akçe hakkım olup merkūm-ı mezbûr vefât edip zimmetinde vâcibü’l-edâ deyn kalmışdır taleb ederim dedikde müdde‘iye-i mezbûrenin sıdk-ı makāline beyyine taleb olundukda udûl-i ricâlden Ebûbekir Beşe b. Ali ve Mehmed b. Receb nâm kimesneler li ecli’ş-şehâdet hâzırân bi’l-meclis olup fi’l-vâki‘ mezbûre Hatice bt. Kemal nâm hâtun merkūm-ı mezbûrun zevce-i metrûkesi olup mezbûreyi bizim huzûrumuzda iki bin akçeye nikâh-ı şer‘î ile nikâh edip merkūm-ı mezbûr vefât edip mezbûre Hatice’nin mehr-i müecceli iki bin akçe zimmetinde kaldı biz bu husûsa şâhidleriz, şehâdet dahi ederiz deyû edâ-i şehâdet-i şer‘iyye eylediklerinde ba‘de ri‘âyeti’ş-şerâit şehâdetleri makbûle oldukdan sonra meblağ-ı mezbûru müteveffâ-yı mezbûrun hâl-i hayâtında taraf-ı şer‘iyyeden bir tarîk ile alıp kabz ve kabûl etmediğine yemîn teklîf olundukda half billâhi’l-aliyyi’l-azîm ettikden sonra meblağ-ı mezbûru edâya ba‘de’t-tenbîh işbu hurûf gıbbe’t-taleb ketb ve imlâ olundu, yed-i râgıba vaz‘ olundu. Cerâ zâlike ve hurrire fi’l-yevmi’s-sâdis min Muharremi’l-harâm li sene 1052. Şuhûdü’l-hâl: Hızır Efendi b. Kemal el-İmâm, Osman Efendi b. Pîr Ali, Ali Bey b. Mustafa, Mehmed Çelebi b. Ahmed, Mustafa Çelebi b. Mehmed.