Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 152 Hüküm no: 115 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Receb b. Ahmed’in kölesi Cafer b. Abdullah’ı azat etmesi Mahmiye-i Galata mahallâtından mahalle-i Yolcuoğlu sâkinlerinden el-Hâc Receb b. Ahmed nâm kimesne meclis-i şer‘-i hatîr-i lâzimü’t-tevkīrde işbu bâ‘isü’l-kitâb orta boylu gök elâ gözlü kulakları delik Cafer b. Abdullah mahzarında bi’t-tav‘ ikrâr ve i‘tirâf edip evsâf-ı mezbûre ile mevsûf olan merkūm Cafer abd-i memlûküm olup hasbeten lillâhi’l-azîm ve taleben li merzâti rabbihi’l-kerîm mâlımdan âzâd eyledim üzerinde hakk-ı velâdan gayrı hakkım kalmadı, ba‘de’l-yevm [35b] sâir ahrâr-ı aslî gibi hür olsun dedikde mukırr-ı mezbûrun vech-i muharrer üzere cârî olan kelâmını el-mukarru lehü’l-merkūm Cafer bi’l-muvâcehe tasdîk ve tahkīk edicek, mezbûr Cafer’in ıtkına hüküm birle hâzihi’l-vesîka gıbbe’t-taleb ketb olundu. Hurrire fî gurreti Muharremi’l-harâm li sene isneteyn ve hamsîn ve elf. Şuhûdü’l-hâl: Ali Efendi b. Cafer el-İmâm, Bektaş Efendi b. Hasan el-İmâm, Şems Efendi b. ( ) el-İmâm, İsa Halife b. ( ) el-Müezzin.