Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 152 Hüküm no: 116 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nazenin bt. Abdullah’ın câriyesi olduğu Halil Reis b. Abdullah’ın ümm-i veledi olmasından dolayı hür olduğu Mahmiye-i Galata’ya tâbi‘ kasaba-i Tophâne mahallâtından el-Hâc [Memi] mahallesi sâkinelerinden işbu orta boylu açık kaşlı elâ gözlü hâfızü hâze’l-kitâb Nâzenin bt. Abdullah nâm hâtun meclis-i şer‘-i hatîr-i lâzimü’t-tevkīrde bundan akdem mahalle-i mezbûrede sâkin iken vefât eden Halil Reis b. Abdullah’ın verâseti kebîr oğlu Mehmed’e ve sagīre kızı Râbia’ya ve zevce-i metrûkesi Selime bt. Ali nâm hâtuna münhasıra oldukdan sonra sagīre-i mezbûrenin tesviye-i umûrları için kıbel-i şer‘den mansûbe vasîsi olan vâlidesi mezbûre Selime Hâtun mahzarında da‘vâ ve takrîr-i kelâm [edip] ben müteveffâ-yı mezbûrun câriye-i memlûkesi olup beni istîlâd etmekle benden Sâliha nâmında bir kızı tevellüd edip mezbûre Sâliha târih-i kitâbdan bir sene mukaddem vefât edip müteveffâ-yı mezbûrun ümm-i veledi olup ba‘de vefâtihî âzâd olmuş iken mezbûrân beni rıkka murâd ederler, suâl olunup men‘ olunmasın taleb ederim dedikde gıbbe’s-suâl ve akībe’l-inkâr müdde‘iye-i mezbûreden da‘vâsına mutâbık beyyine taleb olundukda udûl-i ricâlden Ali Efendi b. Cafer ve Zülfikār b. Abdullah ve Derviş Murad b. Hızır nâm kimesneler li ecli’ş-şehâde meclis-i şer‘a hâzırûn olup gıbbe’l-istişhâd fi’l-hakīka mezbûre Nâzenin müteveffâ-yı mezbûrun istîlâd-ı tasarrufunda iken Sâliha nâmında bir kızı tevellüd edip ümm-i veledi olduğuna şâhidleriz ve şehâdet dahi ederiz deyû her birileri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a oldukda mezbûre Nâzenin’in hürriyetine hüküm birle mâ vaka‘a bi’t-taleb ketb olundu. Tahrîren fi’l-yevmi’s-sâmin ve’l-ışrîn min şehri Muharremi’l-harâm li sene isneteyn ve hamsîn ve elf. Şuhûdü’l-hâl: El-Hâc Receb b. Ahmed, Bekir b. Mehmed, Mümin Hoca b. el-Hâc Ahmed el-Müezzin, Mehmed b. Abdullah, Musli b. Receb, Mehmed b. Mümin ve gayruhüm mine’l-hâzırîn.