Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 180 Hüküm no: 147 Orijinal metin no: [42b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Haydar b. Abdullah’ın Mustafa Beşe b. Abdullah’daki alacağını muhallefâtından tahsil için Mehmed b. Abdullah’a vekalet vermesi Mahmiye-i Galata’da Câmi‘-i Kebîr mahallesinde sâkin el-Hâc Haydar b. Abdullah nâm kimesne meclis-i şer‘-i hatîr-i lâzimü’t-tevkīrde mahrûse-i Kostantıniyye’de Mahmud Paşa mahallesinde sâkin râfi‘ü’l-kitâb Mehmed b. Abdullah nâm kimesne mahzarında ikrâr ve takrîr-i kelâm edip mahmiye-i mezbûrede Hüsam Bey sâkinlerinden iken bundan akdem vefât eden Mustafa Beşe b. Abdullah nâm müteveffâ zimmetinde benim mâl-ı mudârebeden dört yüz guruş hakkım olup kable’l-edâ vefât etmekle muhallefâtından taleb-i da‘vâ edip ba‘de’l-hükm müteveffâ-yı mezbûrun Ömer ve Sâliha nâm sagīrlerine vasiyy-i muhtâr olan işbu hâzır bi’l-meclis es-Seyyid Mahmud Çelebi b. Mehmed Çelebi meblağ-ı merkūm dört yüz guruşun üç yüz elli üç guruşunu müteveffâ-yı mezbûrun muhallefâtından edâ edip ve yine merhûm-ı mezbûrun kasaba-i Sinop’da sâkin Zülfikār Çavuş b. Abdullah nâm kimesne zimmetinde mâl-ı mudârebeden yüz guruş hakkı olup kırk yedi guruşunu merkūm Zülfikār Çavuş b. Abdullah’dan ahz ü kabz eylemek üzere vasiyy-i mezbûr havâle edip ben dahi havâle-i mezbûre[yi] kabûl ve meblağ-ı mezbûr kırk yedi guruşu merkūm Zülfikār Çavuş’dan taleb-i da‘vâ ve ahz [u] kabz ve bana îsâle mütevakkıf umûrda merkūm Mehmed’i kendi cânibimden vekîl nasb edip nefsim için nâib-i menâb eyledim dedikde mezbûr Mehmed dahi vekâlet-i mezbûreyi kabûl ve hizmet-i lâzımesin ta‘ahhüd eylemeğin mâ vaka‘a bi’t-taleb ketb olundu. Hurrire fi’l-yevmi’l-ışrîn min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Es-Sâbikūn.