Galata Mahkemesi 65 Numaralı Sicil (H. 1051 - 1053 / M. 1641 - 1644) cilt: 39, sayfa: 180 Hüküm no: 148 Orijinal metin no: [42b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mustafa Beşe b. Abdullah’ın varislerinin yarım hisse gemilerini Mustafa b. Mehmed’e satmaları Mahmiye-i Galata’ya tâbi‘ kasaba-i Tophâne mahallâtından Mustafa Ağa mahallesinde sâkin iken bundan akdem vefât eden Mustafa b. Mehmed [Mustafa Beşe b. Abdullah] nâm müteveffânın verâseti zevce-i metrûkesi İsmihan bt. Ömer nâm hâtuna ve kebîre kızı Âişe’ye ve sagīre kızları Şâkire ve Fâtıma’ya münhasıra olduğu mütebeyyin ve mütehakkik oldukdan sonra sagīretân-ı mezbûretânın tesviye-i umûrları için kıbel-i şer‘den mansûbe vasîsi olan vâlideleri mezbûre İsmihan nâm hâtun mezbûre Âişe tarafından vekâleten ve sagīretân-ı mezbûretân tarafından vesâyeten ve kendi tarafından asâleten mahfil-i kazâda işbu hâfızü’l-kitâb Mustafa b. Mehmed [43a] nâm kimesne mahzarında bi’l-asâle ve’l-vekâle ve bi’l-vesâye ikrâr ve i‘tirâf edip mûrisimiz müteveffâ-yı mezbûr Mustafa Beşe’nin Karamürsel ta‘bîr olunur sefînenin nısf-ı âharı merkūm Mustafa Beşe’nin olup nısf-ı âharı yine mahalle-i mezbûre sâkinlerinden iken bundan akdem vefât eden Receb Beşe b. Ali nâm müteveffâ ile müşterek olan sefîneyi zarûret-i deyni için bey‘ men yezîd olup rağabât-ı nâs münkatı‘ oldukdan sonra hîn-i müzâyedede müşterî-i mezbûr Mustafa üzerinde nısfı bin üç yüz beş riyâl guruşda karâr edip ziyâde ile tâlib-i âharı olmamağla sefîne-i mersûmenin nısfını asâleten ve vesâyeten ve vekâleten merkūm Mustafa’ya bin üç yüz beş riyâl guruşa bey‘-i bâtt-ı sahîh-i şer‘î ile bey‘ edip kabz-ı semen ve teslîm-i müsemmen eyledim ba‘de’l-yevm sefîne-i mezkûrenin nısfı merkūm Mustafa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde mukırra-i merkūmenin asâleten ve vesâyeten ve vekâleten vech-i muharrer üzere ikrârını el-mukarru lehü’l-merkūm Mustafa vicâhen ve şifâhen tasdîk ve tahkīk edicek sıhhat-i bey‘ine hüküm birle mâ vaka‘a bi’t-taleb ketb olundu. Tahrîren fi’l-yevmi’l-ışrîn min şehri Rebî‘ilevvel li sene isneteyn ve hamsîn ve elf. Şuhûdü’l-hâl: Ali Beşe b. Abdullah, el-Hâc Murad b. Mahmud, Mahmud Çelebi b. Abdullah, Osman b. Mehmed, el-Hâc Süleyman b. Abdullah, Süleyman Çelebi b. Çakırzâde, Mahmud b. Mehmed, Şaban b. Mahmud, Ali b. Mustafa, el-Hâc Haydar Reis [b.] Abdullah, mataracı Musli b. Murad.